பாரம்பரியச் சமையல்கள்! வல்லி கேட்ட கொட்டுக் குழம்பு!

இந்தக் கொட்டுக்குழம்பு வீட்டுக்கு வீடு மாறுபடும் என எண்ணுகிறேன். எனக்குத் தெரிந்து இது அதிகம் சேனைக்கிழங்கு, சர்க்கரை வள்ளிக்கிழங்கு, கருணைக்கிழங்கு ஆகியவற்றிலேயே பண்ணிப் பார்த்திருக்கேன். கல்யாணம் ஆகி வரும்வரை இது குறித்துத் தெரியாது. ஆனால் புக்ககத்திலே பண்ணிப் பார்த்திருக்கேன். அந்தச் செய்முறையைப் பின்னர் சொல்கிறேன்.இப்போது பொதுவான செய்முறைக்குத் தேவையான பொருட்கள்:

எலுமிச்சை அளவுக்குப் புளி, உப்பு தேவையான அளவு, குழம்புப் பொடி 3 டீஸ்பூன்.

தாளிக்க எண்ணெய், கடுகு,வெந்தயம், துவரம்பருப்பு மட்டும், மிளகாய் வற்றல், கருகப்பிலை

தான்களாக கத்திரிக்காய், வெண்டைக்காய், முருங்கைக்காய், சர்க்கரை வள்ளிக்கிழங்கு போன்றவை போடலாம். ஒரு சிலர் முள்ளங்கி, உருளைக்கிழங்கு ஆகியவையும் போடுகின்றனர். இதற்குச் சிலர் அடியில் தாளித்துச் செய்கின்றனர். சிலர் தான்களை மட்டும் வதக்கிக் கொண்டு புளியைக் கரைத்துவிட்டுப் பொடி, உப்புப் போட்டுக் கொதித்த பின்னர் தாளிதம் செய்கின்றனர்.  இரண்டு முறையிலும் செய்யலாம். முள்ளங்கி, உருளைக்கிழங்கு போன்ற தான்கள் எனில் அடியில் தாளித்து வதக்கிச் சேர்க்க வேண்டாம். மற்றத் தான்களை வதக்கினால் ருசி கூடும். அடியில் தாளித்துச் செய்தால் சாதாரண வற்றல் குழம்பு, வெறும் குழம்பு ருசி போல் ஆகிவிடும் என்பதால் பலரும் இதைக் கொதிக்கவிட்டுப் பின்னர் இறக்கும்போதே கடுகு, மிவத்தல், கருகப்பிலை தாளிப்பார்கள். இது அவரவர் சௌகரியம் போல் செய்துக்கலாம்.

இதையே மி.வத்தல், தனியா, துவரம்பருப்பு, வெந்தயம், பெருங்காயம் ஆகியவற்றை வறுத்துப் பொடி செய்து கொண்டு தான்களைப் போட்டு வதக்கிக் கொண்டு முதலில் கொஞ்சம் புளி ஜலத்தில் தான்களை வேகவிட்ட பின்னர் மிச்சம் புளி ஜலத்தை விட்டுக் கொண்டு தேவையான உப்பையும், வறுத்துப் பொடித்த பொடியையும் போட்டுக் கொதிக்க விட்டுப் பின்னர் கடுகு, கருகப்பிலை, மி.வத்தல் தாளிப்பார்கள்.  இந்த முறையில் செய்தால் கட்டாயம் கடைசியில் தான் தாளிக்கணும். வெந்தயம் சேர்ப்பது அவரவர் விருப்பம். நான் வெந்தயம் நிறையச் சேர்ப்பதால் இதிலும் போடுவேன்.

இப்போது எங்க வீட்டில் செய்யும் கொட்டுக்குழம்பு முறை:

புளி எலுமிச்சை அளவுக்கு ஊற வைத்துக் கரைத்துக்கொள்ளவும். 3 கிண்ணம் புளி ஜலம்.
உப்பு தேவையான அளவு. குழம்புப் பொடி 3 டீஸ்பூன்,

தாளிக்க நல்லெண்ணெய், தாளிக்கும் பொருட்கள்: கடுகு, வெந்தயம், துவரம்பருப்பு மட்டும், மிவத்தல், கருகப்பிலை, பல்லுப் பல்லாகக் கீறிய தேங்காய்க் கீற்றுகள், கொண்டைக்கடலை, மொச்சை வகைக்கு இரண்டு டீஸ்பூன்கள், பெருங்காயம், மஞ்சள் பொடி

தான்களாக! நீளமாக நறுக்கிய சேனைக்கிழங்கு, சர்க்கரைவள்ளிக்கிழங்கு, கருணைக்கிழங்கு ஆகிய ஏதேனும் ஓர் கிழங்கு அல்லது கத்திரிக்காய், முருங்கைக்காய், சின்ன வெங்காயம் போன்ற ஏதேனும் ஒன்று. நாங்க இந்தக் குழம்புகளில் முள்ளங்கியோ உருளைக்கிழங்கோ சேர்ப்பதில்லை.

இப்போது கடாய்/உருளி/கல்சட்டியை வைத்து எண்ணெயைக் காய வைத்துக் கொண்டு கடுகு, வெந்தயம், பருப்பைத் தாளித்துக் கொண்டு உடனேயே கொண்டைக்கடலை, மொச்சையைப் போட்டு வெடிக்க விடவும். பின்னர் மி.வத்தல், கருகப்பிலை, பெருங்காயம் வரிசையாகச் சேர்க்கவும். அதன் பின்னர் தான்களைப் போட்டு வதக்கிக் கொண்டு பல்லுப் பல்லாகக் கீறிய தேங்காய்க்கீற்றுக்களையும் போட்டு வதக்கவும். மஞ்சள் பொடி சேர்க்கவும். கரைத்து வைத்த புளி ஜலத்தை ஊற்றிவிட்டுக் குழம்புப் பொடியும் உப்பும் சேர்க்கவும். குழம்பு சேர்ந்து கொதித்த பின்னர் அடுப்பிலிருந்து இறக்கி இரண்டு டீஸ்பூன் நல்லெண்ணெய் பச்சையாக மேலே விடவும். தேவையானால் குழம்பை இறக்கும் முன்னர் ஒரு சின்னத் துண்டு வெல்லம் சேர்க்கலாம். நான் வெல்லம் சேர்ப்பதில்லை.  இந்தக் குழம்புக்கு மாவெல்லாம் கரைத்து விடவும் வேண்டாம். அதுவே சேர்ந்துக்கும்.