சில உருளைக்கிழங்கு செய்முறைகள் !

உருளைக்கிழங்கு சமையல்கள்:

உருளைக்கிழங்குக் காரக்கறி: உருளைக்கிழங்கு கால் கிலோ, மிளகாய்த்தூள், உப்பு, பெருங்காயத்தூள் ஒரு சிட்டிகை, எண்ணெய் வதக்க. கடுகு தாளிக்கத் தேவையான அளவு.

உருளைக்கிழங்கை மண்போக நன்கு கழுவித் தோலை நீக்கவேண்டுமானால் நீக்கிவிட்டுப் பொடிப் பொடியாக நறுக்கவும். கடாயில் எண்ணெய் விட்டுக் கடுகு தாளித்து, நறுக்கிய உருளைக்கிழங்குகளைப் போட்டு, உப்பு, மிளகாய்த்தூள் சேர்த்து மொறுமொறுவெனப் பொன்னிறமாக ஆகும்வரை வதக்கவும்.

உருளைக்கிழங்கு காரக்கறி 2-ஆம் வகை: உருளைக்கிழங்கு கால் கிலோ, வெங்காயம் பெரியதெனில் இரண்டு, சின்ன வெங்காயம் என்றால் நூறுகிராம் தோல் உரித்துப் பொடிப்பொடியாக நறுக்கிக் கொள்ளவும். பச்சை மிளகாய் ஒன்று, மிளகாய்த்தூள் 2 டீஸ்பூன், உப்பு தேவையான அளவு, கருகப்பிலை, தாளிக்கக் கடுகு, உ.பருப்பு, க.பருப்பு, பெருங்காயத்தூள். வதக்க எண்ணெய்.

உருளைக்கிழங்கைக் கழுவி வேக வைத்துத் தோலுரித்துக்கொண்டு ஒன்றிரண்டாக மசிக்கவும். அல்லது நான்கு பாகமாகவோ சிறிய துண்டுகளாகவோ நறுக்கிக்கொள்ளலாம். கடாயில் எண்ணெய் ஊற்றிக் கடுகு, பெருங்காயப்பொடி, கருகப்பிலை, க.பருப்பு, உ.பருப்பு தாளித்துக்கொண்டு, பச்சைமிளகாயையும் அரிந்து போடவும். பின் நறுக்கிய வெங்காயத்தைச் சேர்த்துக்கொண்டு நன்கு பொன்னிறமாக ஆகும்வரை வதக்கவும். பின்னர் வேக வைத்த உருளைக்கிழங்கைச் சேர்த்து உப்பு, மிளகாய்த்தூள் சேர்க்கவும். நன்கு பொடி வாசனை போகும் வரை வதக்கி எடுக்கவும். இதிலேயே இறக்குகையில் கொஞ்சம் கரம்மசாலாவைப் போட்டால் மசாலா கிழங்காக ருசிக்கலாம். தேவை எனில் பச்சைக் கொத்துமல்லியைத் தூவவும்.

உருளைக்கிழங்கு போண்டோ:

மேலே சொன்ன மாதிரி கொஞ்சம்காரத்தைக் குறைத்துக்கொண்டு உருளைக்கிழங்கு கறி தயாரித்துக்கொள்ளவும்.

மேல்மாவுக்குத் தேவையான பொருட்கள்; கடலைமாவு இரண்டு கிண்ணம், அரிசி மாவு அரைக்கிண்ணம், மிளகாய்த்தூள் 2 டீஸ்பூன், உப்பு, பெருங்காயத்தூள், கரைக்க நீர்.

பொரிக்க எண்ணெய்

கடலைமாவு, அரிசிமாவு,மிளகாய்த்தூள், பெருங்காயத்தூள் உப்புச் சேர்த்துக்கலந்து கொண்டு நீர் விட்டு தோசை மாவு பதத்துக்குக் கரைக்கவும்.

இப்போது தயாராக வைத்திருக்கும் உருளைக்கிழங்கு கறியை ஒரு எலுமிச்சம்பழ அளவுக்கு உருண்டைகளாக உருட்டிக் கொள்ளவும்.

கடாயில் எண்ணெய் வைத்து அடுப்பில் வைக்கவும். எண்ணெய் காய்ந்ததும், அடுப்பைத் தணித்துக் கொண்டு உருளைக்கிழங்கு உருண்டைகளை மாவில் நன்கு தோய்த்துக்கொண்டு எண்ணெயில் போடவும். நன்கு திருப்பிப் போட்டு வெந்ததும் கரண்டியால் அரித்து எடுத்து வடிகட்டவும். சூடான தேங்காய்ச் சட்னியுடன் பரிமாறவும்

உருளைக்கிழங்கு பஜ்ஜி:

உருளைக்கிழங்கு பெரிதாக ஒன்றிருந்தாலே போதும். நன்கு கழுவிக் கொண்டு தோலைச் சீவி விட்டு வட்ட வட்டமாகச் சீவித் தண்ணீரில் போடவும். உருளைக்கிழங்கை நன்கு தண்ணீரில் போட்டு அலசிவிட்டால் அதிலுள்ள மாவுச்சத்து குறையும் என்பார்கள். உண்பதில் கவலைப்படவேண்டாம்.

பஜ்ஜி மாவுக்கு: 2 கிண்ணம் கடலைமாவு, அரைக்கிண்ணம் அரிசி மாவு,அரைக்கிண்ணம்மைதா மாவு, உப்பு, மிளகாய்த்தூள், பெருங்காயத்தூள்,கரைக்க நீர், பொரிக்க எண்ணெய்

எல்லா மாவுகளையும் ஒன்றாய்க் கலந்து கொண்டு உப்பு, மிளகாய்த்தூள், பெருங்காயத்தூள் சேர்க்கவும். நீர் விட்டுக் கொண்டு தோசைமாவு பதத்துக்குக் கரைக்கவும்.

கடாயில் எண்ணெய் வைத்துக் கொண்டு எண்ணெய் காய்ந்ததும், வட்டமாக நறுக்கிய உருளைக்கிழங்கு வில்லைகளை மாவில் தோய்த்துக்கொண்டு எண்ணெயில் போடவும். சூடான தேங்காய்ச் சட்னி, கொத்துமல்லிச் சட்னியோடு பரிமாறவும்.

உருளைக்கிழங்கு வடை: ஜவ்வரிசி ஒரு கிண்ணம். தயிரில் ஊறப் போடவும். உருளைக்கிழங்கு பெரிதாக இரண்டு. வேகவைத்துத் தோலுரித்துக்கொள்ளவும். வேர்க்கடலை ஒரு கிண்ணம் நன்கு வறுத்துப் பொடித்துக்கொள்ளவும். 6 பச்சை மிளகாய், ஒரு துண்டு இஞ்சி, ஒரு சின்னக் கட்டுக் கொத்துமல்லி சேர்த்து அரைத்த விழுது ஒரு டேபிள் ஸ்பூன் உப்பு, பெருங்காயப் பொடி, காரப்பொடி(தேவையானால்) பச்சைமிளகாய்க் காரமே போதுமெனில் அதோடு நிறுத்திக்கொள்ளலாம். காரம் போதவில்லையெனில் அரைத்த விழுதையே இன்னும் கொஞ்சம் சேர்க்கலாம்.

இப்போது ஜவ்வரிசி நன்கு ஊறி இருக்கும். அதில் வேர்க்கடலை மாவு, வெந்த உருளைக்கிழங்கைச் சேர்த்துப் பிசையவும். காரத்திற்குத் தேவையான அளவு அரைத்த விழுது, உப்புச் சேர்க்கவும். பெருங்காயத்தூள், கருகப்பிலை தேவை எனில் சேர்க்கவும் அநேகமாகப் பிசைந்த மாவு கெட்டியாகவே இருக்கும். இல்லை எனில் கொஞ்சம் மைதாமாவோ அல்லது கடலைமாவோ சேர்க்கலாம். சற்றுநேரம் வைத்திருந்தால் ஜவ்வரிசி நன்கு ஊறி ஈரத்தை இழுத்துக்கொள்ளும்.

இப்போது கடாயில் எண்ணெய் வைத்துக் கொண்டு எண்ணெய் காய்ந்ததும், மாவை வடைகளாய்த் தட்டி எண்ணெயில் போடவும். ஜவ்வரிசி நன்கு பொரிந்து வடை மொறுமொறுவென வரும். சூடான தக்காளிச் சட்னி அல்லது புளிச்சட்னி, பச்சைச் சட்னியோடு சாப்பிடலாம்.

உருளைக்கிழங்கு தம் அல்லது ஆலு தம்: ஓரே மாதிரியான சின்னச் சின்ன உருளைக்கிழங்கு கால் கிலோ. வேகவைத்துத் தோல் உரித்துக்கொள்ளவும். வெந்த கிழங்கில் இரண்டு மூன்று இடங்களில் சற்றுப் பெரிய ஊசி அல்லது பல் குத்தும் குச்சியால் குத்திவிட்டுவிட்டு மிளகாய்த்தூள், உப்புச் சேர்த்து
வதக்கி வைத்துக்கொள்ளவும்.

தக்காளி கால் கிலோ நன்கு வேக வைத்துச் சாறை மட்டும் எடுத்துக்கொள்ளவும்.

பச்சை மிளகாய், இஞ்சி, பூண்டு, சிவப்பு மிளகாய்(தேவை எனில்) சேர்த்து அரைக்கவும். வெங்காயம் தேவைப்பட்டால் சேர்க்கலாம். பூண்டைக் குறைத்து வெங்காயம் சேர்க்கலாம். அல்லது பூண்டு போடாமல் வெங்காயம் சேர்க்கலாம்.

வதக்க, தாளிக்க எண்ணெய் அல்லது வெண்ணெய்/வனஸ்பதி, க்ரீம் அல்லது வெண்ணெய், அல்லது சீஸ், தயிர் கெட்டியாக. மஞ்சள் தூள்

கரம் மசாலா பவுடர் ஒரு டீஸ்பூன். கரம் மசாலா பவுடர் தயாரிப்பு முறை

சோம்பு 50 கிராம்
லவங்கப்பட்டை 25 கிராம்
லவங்கம் என்ற கிராம்பு ஐந்து எண்ணிக்கை
பெரிய ஏலக்காய் நான்கு

இவற்றை வெறும் வாணலியில் வறுத்து மிக்சியில் பொடித்து வைத்துக்கொள்ளவும். கிராம்பு அதிகம் சேர்த்தால் காரம் அதிகமாக இருக்கும்.

இப்போது கடாய் அல்லது நான்-ஸ்டிக் பாத்திரத்தில் வெண்ணெய் அல்லது எண்ணெய் ஊற்றி ஒரு டீஸ்பூன் சர்க்கரை போடவும். சர்க்கரை கரைந்ததும் அரைத்த மசாலா விழுதைப் போட்டு மஞ்சள் தூள் சேர்த்து நன்கு எண்ணெய் பிரியும் வரை வதக்கவும். எண்ணெய் பிரிகையில் வடிகட்டி வைத்த தக்காளிச் சாறை ஊற்றவும். தேவையான உப்பைப் போடவும். சற்றுக் கொதித்ததும் பொரித்து வைத்துள்ள உருளைக்கிழங்குகளைப் போடவும். உருளைக்கிழங்கு சேர்ந்து கொதித்துக் கொண்டிருக்கையில் தயிரை நீர்விடாமல் நன்கு கடைந்து அதில் மேலே ஊற்றவும். சற்று நேரம் பொறுத்துக் கீழே இறக்கிவிட்டுக் க்ரீம் அல்லது வெண்ணெய் சேர்க்கவும். இல்லை எனில் சீஸைத் துருவிச் சேர்க்கவும். பச்சைக்கொத்துமல்லியால் அலங்கரிக்கலாம். சப்பாத்தி, பராட்டாவிற்கு ஏற்ற சைட் டிஷ் இது.