இன்னமும் பொடி தான்! பெரிய விஷயமே இல்லை!

இந்தப் பக்கத்திலே தினம் தினம் பதிவு வரவில்லை என நெல்லைத் தமிழரும் ஜேகே அண்ணாவும் சொல்கின்றனர். தினமெல்லாம் எழுதுவது இப்போதைய நிலைமையில் எனக்குச் சிரமம்.நேரம் கிடைக்கும் போது எழுதினாலே பெரிய விஷயம்!  அதோடு நெல்லைத் தமிழரே எல்லாவற்றுக்கும் படங்கள் எதிர்பார்க்கிறார். காலை வேளையில் நான் சமைக்கும்போது நினைவாகப் படங்கள் எடுத்துக் கொண்டிருக்க முடியுமா? முதல்லே நினைவே வராது. என்னிக்காவது நினைவு வந்தால் அன்னிக்குப் படம் எடுக்கிறேன். ஆகவே எழுதுவதில் இருக்கும் வசதி படங்கள் எடுப்பதில் இல்லை. இந்தக் கடந்த வாரங்களில் படம் எடுக்கும்படியான சூழ்நிலையோ, சமையலோ அமையவில்லை.  ஆகவே இன்னும் சில பொடிவகைகளை முதலில் பார்ப்போம்.அரைத்து விட்ட சாம்பாருக்கு இன்னமும் நேரம் வரவில்லை. வரும்போது நான்படமும் எடுத்தாகணும்!  படிக்கிறவங்க படிக்கட்டும்; இன்னும் விரிவாகத் தேவைப்படுபவர்களுக்கு ஏமாற்றம் வந்தால் என்ன செய்ய முடியும்!

இப்போது இன்னும் சில பொடி வகைகள்:- இவற்றைச் சாதத்தில் போட்டுப் பிசைந்து சாப்பிடலாம். என்னிக்கானும் சாம்பார் வைக்கவில்லை என்றாலோ அல்லது மற்றக் குழம்புகளும் தேவை இல்லை என்றாலோ இதைப் போட்டுச் சாப்பிட்டுக்கலாம். முதலில் பருப்புப் பொடி.

பருப்புப் பொடி: தேவையான பொருட்கள். முக்கியமாய்த் துவரம்பருப்பு. சிலர் பாதி அளவுக்குக் கடலைப்பருப்பும் சேர்க்கின்றனர். இது அவரவர் வசதிக்கு ஏற்ப!

நான் துவரம்பருப்பு மட்டுமே சேர்ப்பேன்.

ஒரு கிண்ணம் துவரம்பருப்பு எனில் நான்கு அல்லது ஐந்து மிளகாய் வற்றல்கள், பெருங்காயத் துண்டு, மிளகு இரண்டு டீஸ்பூன், உப்பு தேவையான அளவு. கருகப்பிலை விருப்பம் இருந்தால்.

    

    

எல்லாவற்றையும் வெறும் வாணலியில் வறுத்துக் கொண்டு (உப்பையும் வறுக்கலாம்.) ஆறியதும் மிக்சி ஜாரில் போட்டு நைஸாகப் பொடித்துக் கொள்ளவும். இதைச் சூடான சாதத்தில் போட்டு நெய் அல்லது நல்லெண்ணெய் ஊற்றிச் சாப்பிடலாம்.

இதையே அரைக்கிண்ணம் துவரம்பருப்பு+அரைக்கிண்ணம் கடலைப்பருப்புச் சேர்த்தும் பண்ணலாம். இதில் கடலைப்பருப்புப் பருப்புப் பொடியின் காரத்தைக் குறைக்கும்.
 

அடுத்துக் கொத்துமல்லிப் பொடி அல்லது தனியாப்பொடி
கொத்துமல்லி விதை ஒன்று அல்லது இரண்டு கிண்ணம்

    

மி.வத்தல் காரமானதாக இருந்தால் 4,5 போதும். இல்லை எனில் பத்து வேண்டும்.

துவரம்பருப்பு, கடலைப்பருப்பு, உளுத்தம்பருப்பு வகைக்கு ஒரு டேபிள் ஸ்பூன்

பெருங்காயம் விரும்பினால் அல்லது பொடிக்கையில் பவுடரைச் சேர்த்துக்கலாம்.

மிளகு இரண்டு டீஸ்பூன்

உப்பு தேவையான அளவு. இதில் கொஞ்சம் போல் புளியையும் நன்கு காய்ந்ததாக எடுத்துக் கொண்டு வெறும் வாணலியில் போட்டுப் பிரட்டிப் பின்னர் பொடி செய்கையில் சேர்த்துப் பொடி பண்ணினால் அதன் ருசி தனியாக இருக்கும்.

கருகப்பிலைப் பொடி

கருகப்பிலைப் பொடி! கருகப்பிலை சுமார் 100 கிராம். நன்கு காய வைக்கவும்.
 
மி.வத்தல் 5 அல்லது ஆறு

உப்பு,

ஓமம்    அல்லது     பெருங்காயம் அல்லது இரண்டுமே.

ஓமம் இரண்டு டேபிள் ஸ்பூன் வரை போடலாம். ஒரு சிலருக்கு அந்தக் காரம் ஒத்துக்கொள்ளாது. அப்போது ஓமம் போடாமல் உளுத்தம்பருப்பு, மிளகு வெறும் வாணலியில் வறுத்துக் கொண்டு உப்பு, பெருங்காயம் சேர்த்து நன்கு மொறுமொறுவென வறுக்கப்பட்ட கருகப்பிலையுடன் சேர்த்துப் பொடிக்கவும். இதை மோர் சாதத்துக்குத் தொட்டுக்கொள்ள நன்றாக இருக்கும்.

படங்களுக்கு நன்றி கூகிளார்.