வாழ்க்கையில் ரசம் இல்லையா? இந்த ரசத்தைச் செய்து சாப்பிடுங்க!

ஒரு சில ரச வகைகளை இப்போது பார்க்கலாம்.  என்னடா முன்னுக்குப் பின் தொடர்பில்லாமல் வருதேனு நினைக்கிறவங்களுக்கு, இன்னிக்கு இதைக் கேட்டிருக்காங்க.  :)))))

முதலில் மிளகு, ஜீரகம் உடைத்த ரசம்:

நான்கு பேர்களுக்குத் தேவையான பொருட்கள்

புளி ஒரு சின்ன எலுமிச்சை அளவு

உப்பு தேவைக்கு

மி.வத்தல் இரண்டு

மஞ்சள் பொடி,

பெருங்காயம்

தக்காளி(தேவையானால்) சின்னது ஒண்ணு அல்லது பாதி

கருகப்பிலை, கொ.மல்லி

மிளகு ஒரு டீஸ்பூன்

ஜீரகம் ஒரு டீஸ்பூன்

தாளிக்க நெய்

கடுகு

முதலில் புளியை நன்கு ஊற வைத்துக் கரைத்துக் கொள்ளவும்.  மிளகு, சீரகத்தை ஒன்றிரண்டாகப் பொடித்துக்கொள்ளவும். தனியே வைக்கவும். புளிக்கரைசலில்  உப்பு, மஞ்சள் பொடி, பெருங்காயப் பொடி சேர்த்துக்  கொண்டு கொதிக்க வைக்கவும். ஒரு மிளகாய் வற்றலை இரண்டாகக் கிள்ளிச் சேர்க்கவும்.  தக்காளியையும் விரும்பினால் சேர்க்கவும்.  நன்கு கொதித்ததும் தேவையான அளவுக்கு நீரை விட்டு விளாவவும். பொங்கி வரும்போது அடுப்பை அணைக்கவும்.

இன்னொரு அடுப்பில் வாணலி அல்லது இரும்புக்கரண்டியை வைத்து நெய்யை ஊற்றவும்.  கடுகைப்போடவும்.  கடுகு வெடித்ததும் மிச்சம் இருக்கும் மி.வத்தல், கருகப்பிலை சேர்க்கவும்.   பொடித்து வைத்த மிளகு, சீரகக் கலவையை ரசத்தின் மேலே போட்டு அதன் மேலே தாளிதத்தைச் சூடாக இருக்கையிலேயே ஊற்றவும்.  கொத்துமல்லி தூவவும்.  சூடான நெய் விட்ட சாதத்தில் ரசத்தை ஊற்றிச் சாப்பிடவும்.  அப்படியே குடிக்கவும் நன்றாக இருக்கும்.

அடுத்து சீரக ரசம்.  அரைத்துவிட்டுச் செய்யும் முறை

நான்கு பேர்களுக்கு முன் சொன்னபடி

புளி ஒரு சின்ன எலுமிச்சை அளவு

உப்பு

மஞ்சள் பொடி

இதுக்குப் பெருங்காயம் வேண்டாம்.

தாளிக்க

நெய்

கடுகு,
மி.வத்தல்
கருகப்பிலை

மி.வத்தல் ஒன்று, ஒரு டீஸ்பூன் மிளகு, இரண்டு டீஸ்பூன் ஜீரகம் ஊற வைக்கவும்.  அதை ஒரு பிடி கருகப்பிலையோடு சேர்த்து நன்கு அரைக்கவும்.  தனியே வைக்கவும்.

புளியை நன்கு கரைத்துக் கொண்டு உப்பு, மஞ்சள் பொடி சேர்த்துக் கொதிக்க வைக்கவும்.  நன்கு புளி வாசனை போகக் கொதித்ததும் அரைத்த கலவையைக் கொஞ்சம் நீர் சேர்த்து ரசத்தில் விடவும்.  ரசம் தேவையான அளவுக்கு வரவில்லை எனில் இன்னும் கொஞ்சம் நீர் சேர்த்து விளாவவும்.  மேலே நுரைத்து வரும்போது அந்த நுரையை எடுத்துவிடவும். பின்னர் நெய்யில் கடுகு,மி.வத்தல், கருகப்பிலை தாளிக்கவும்.  ஜுரம் வந்த வாய்க்கு, அல்லது வயிற்றுக்கோளாறுக்கு மிக்க நன்மை பயக்கும் ரசம் இது.  இதையும் குடிக்கலாம்.  புழுங்கல் அரிசியில் கஞ்சி வைத்து இந்த ரசத்தை ஊற்றிக் குடிக்கலாம்.