உணவே மருந்து! கீரை வகைகள்! முடிவு! திப்பிசம் ஆரம்பம்!

இன்னும் சில கீரை வகைகள் இருந்தாலும் அவற்றைச் சமைத்துப் பார்க்காமல் எப்படிச் சொல்வது? ஆகவே சொல்லவில்லை. அவற்றில் கல்யாண முருங்கை, புண்ணக்கீரை, தும்பைக்கீரை, மணலிக்கீரை, காசினிக்கீரை, (சிலர் புளிச்ச கீரை தான் காசினி என்கின்றனர்!) அதே போல் சக்கரவர்த்திக்கீரை(பருப்புக்கீரை தான் அப்படி அழைக்கப்படுகிறது என நினைக்கிறேன்.)சாணக்கீரை, வெள்ளைக்கீரை, விழுதுக்கீரை, ஆரக்கீரை, துத்தி, குப்பைக்கீரை (குப்பைமேனி அல்ல)  போன்றவை அடங்கும்.  இவற்றில் க்ளாவர் போன்ற அமைப்புடன் இருக்கும் ஆரக்கீரை நீரிழிவு நோய்க்குச் சிறந்த மருந்து எனச் சொல்லப்படுகிறது. பொதுவாகவே பச்சைக்காய்களும், கீரை வகைகளும் உடல் நலத்துக்கு ஏற்றவை.  கிடைக்கும் கீரைகளை வாங்கிச் சாப்பிட்டாலே போதும். கீரை வகைகள் சிறந்த மலமிளக்கியாகவும் செயல்படுகின்றன.


ஆரக்கீரை

மேற்சொன்ன கீரைவகைகளைச் சமைத்தது இல்லை. ஆகவே சொல்லவில்லை. இப்போச் சில திப்பிச வேலைகளைச் சொல்றேன். முந்தாநாளைக்கு இட்லிக்குத் தேங்காய்ச் சட்னி அரைச்சேன். மிஞ்சிப் போச்சு. சரினு நேத்திக்குக்கொஞ்சம் போல் கொ.வி. க.ப.து.ப. நனைச்சு வைச்சுக் கொஞ்சூண்டு தேங்காயோடு அரைச்சுச் சட்னியில் கொஞ்சம் எடுத்துக் கலந்துகொண்டு தயிரில் கலந்தேன். உப்புப் பார்த்துப் போடணும். ஏனெனில் சட்னிக்கு உப்புப் போட்டு அரைச்சிருக்கோமே! தயிரில் கலந்தது நிறைய இருக்கவே அவ்வளவு செலவாகாதுனு கொஞ்சம் எடுத்து வைச்சுட்டு மிச்சம் இருக்கும் கலவைக் குழம்பில்,மஞ்சள் பொடி, பெருங்காயத் தூள், தயிருக்குத் தேவையான உப்பு மட்டும் போட்டு சேப்பங்கிழங்கை வேகவைத்துக் கலந்து அடுப்பில் வைத்துச் சூடு பண்ணினேன். நன்கு கொதித்து வந்ததும் கீழே இறக்கித் தே.எண்ணெயில் கடுகு, வெந்தயம், கருகப்பிலை, பாதி மி.வ. தாளித்தேன். மோர்க்குழம்பு ரெடி. இன்னொரு நாளைக்குக் குளிர்சாதனப் பெட்டியில் உப்புச் சேர்க்கப்படாமல் கொதிக்க வைக்கப்படாமல் தயார் ஆகக் காத்துட்டு இருக்கு.



அப்படியும்கொஞ்சம் சட்னி மிச்சம் தான்! எல்லாம் இந்த ரங்க்ஸை நம்ப முடியறதே இல்லை. ஒரு நாளைக்குப் போட்டுப்பார். ஒரு நாளைக்குப் போட்டுக்க மாட்டார். அதுக்காகக் கொஞ்சமா அரைச்சாப் பாத்திரத்தைத் தடவவா முடியும்! மிஞ்சின சட்னியை என்ன செய்யறதுனு ம.கு. இன்னிக்கு மத்தியானம் சாப்பாடுக்குக் காய் என்ன செய்யலாம்னு யோசிச்சப்போ 2 நாள் முன்னர் பீன்ஸ், காரட் கறிக்கு நறுக்கி மிஞ்சி இருந்த பீன்ஸ், காரட் துண்டங்கள் நினைவில் வந்தன. ஒரு சின்னத் துண்டு பறங்கிக்காயும் இருந்தது. அதையும் நறுக்கி அவற்றோடு சேர்த்து நன்கு நீர் விட்டுக் கழுவி வடிகட்டி வைத்துக் கொண்டேன். சின்னக்குக்கரில் இரண்டு டீஸ்பூன் பாசிப்பருப்பைக் கழுவிச் சேர்த்தேன். ஒரு தம்பளர் நீர் ஊற்றினேன். அலம்பி வைத்திருந்த காய்களையும் அதில் சேர்த்து உப்பு, மஞ்சள் பொடி போட்டு இரண்டு விசில் கொடுத்து இறக்கினேன். பின்னர் திறந்து அதில் மிச்சம் இருக்கும் சட்னி விழுதைக் கலந்து அடுப்பில் வைத்து ஒரு கொதி விட்டு இறக்கினேன். தே.எண்ணெயில் கடுகு, உபருப்பு, மி.வத்தல் பாதி, கருகப்பிலை தாளித்துக் கொஞ்சம் துருவிய தேங்காயை இரண்டு டீஸ்பூன் போட்டு வறுத்துக் கூட்டில் சேர்த்தேன். கூட்டு நன்றாக இருந்தது. என்னோட அம்மா பொரிச்ச கூட்டுப்பண்ணுவது எனில் காய்களை வேகவைத்து உப்பு, மஞ்சள் பொடி சேர்த்து, அரை ஸ்பூன் சாம்பார்ப் பொடி போட்டு வெறும் தேங்காயும், அரிசியும் மட்டும் அரைச்சு விடுவார். அநேகமாக நான் தான் அம்மியில் அரைத்துக் கொடுப்பேன் என்பதால் நன்றாகத் தெரியும். பொரிச்ச கூட்டில் பருப்பு இருக்காது.  அநேகமா என் பிறந்த வீட்டில் பொரிச்ச கூட்டு எனில் பருப்பு இல்லாமலே செய்வாங்க. புளி விட்ட கூட்டு எனில் கொஞ்சமாகத் துவரம்பருப்பு குழைய வேக வைத்துச் சேர்ப்பார்கள். பொரிச்ச குழம்பு என்றால் தான் பாசிப்பருப்போ, துவரம்பருப்போ போடுவார்கள்.

இது போலத் தான் முன்னர் ஒரு நாள் மோர்க்குழம்பு வைத்தது மிஞ்சிப் போயிற்று. அதிலிருந்தே இப்போல்லாம் மோர்க்குழம்புக்கு அரைத்துக் கலக்கும்போதே கொஞ்சமாக் கலக்கிப்பேன். நிறைய இருந்தா எடுத்துத் தனியே வைச்சுடுவேன் இன்னொரு நாளைக்கு ஆகட்டும் என! ஆனா அன்னிக்கு என்ன செய்யறது, இவ்வளவு நல்ல மோர்க்குழம்பைனு நினைச்சப்போ தஹி ஆலூ நினைவில் வர, உ.கி. வேகப் போட்டுத் துண்டங்களாக எடுத்துக் கொண்டேன். கடாயில் எண்ணெய் விட்டு இஞ்சி, ப.மி. போட்டு, வெங்காயம் போட்டு நன்கு வதக்கிக் கொண்டு உ.கி. போட்டு வறுத்து மி.பொடி, த.பொடி.ம.பொடி சேர்த்து நன்கு வதக்கினேன். பின்னர் கொஞ்சம் கரம் மசாலாவும் போட்டு நன்கு  வதக்கினேன். மோர்க்குழம்பை எடுத்துச் சூடாக்கி வதக்கிய உ.கி. மசாலாவை அதில் போட்டு மேலே கொஞ்சம் போல் அன்று எடுத்த புது க்ரீமைச் சேர்த்தேன். க்ரீம் இல்லைனா வெண்ணெய் போட்டுக்கலாம். கசூரி மேதி சேர்த்துக் கீழே இறக்கிப் பச்சைக் கொ.மல்லி தூவினேன். அன்றைய இரவுக்குச் சப்பாத்திக்கான சைட் டிஷ் தயார்.




படங்களுக்கு நன்றி கூகிளார் வாயிலாக தினகரன்!

இப்போத் தான் இந்த உ.கி. சாப்பிடவே பயம்மா இருக்கே! 

உணவே மருந்து! முள்ளங்கிக் கீரை! 3

முள்ளங்கிக் கீரையைப் பருப்புசிலியாகவும் செய்யலாம். சாதாரணமாய்ப் பருப்பு உசிலிக்கு அரைப்பது போல் பருப்பை ஊற வைத்துக் கொண்டு உப்புக் காரம், பெருங்காயம் சேர்த்து அரைத்துக் கொண்டு அதில் கீரையையும் நரம்பு நீக்கிப் பொடியாக நறுக்கிச் சேர்த்து இட்லித் தட்டில் ஆவியில் வேக விட வேண்டும். பின்னர் கடாயில்தே.எண்ணெய் அல்லது நல்லெண்ணெய் ஊற்றிக் கொண்டு கடுகு, உ.பருப்பு தாளித்துக்கருகப்பிலை போட்டு வதக்கியதும். வெந்து எடுத்ததை உதிர்த்து அதில் சேர்த்து நன்கு கிளற வேண்டும். உதிராக வரும் வரை கிளறணும். தேவையானால் கொஞ்சம் எண்ணெய் சேர்க்கலாம்.

அடுத்துப் பொரிச்ச குழம்பு போல் செய்யலாம்.

ஒரு கட்டு முள்ளங்கிக்கீரை பொடியாக நறுக்கவும்.

பாசிப்பருப்பு அல்லது துவரம்பருப்பு அரைக்கிண்ணம் நன்கு குழைய வேக வைக்கவும்.
உப்பு தேவைக்கு
வறுத்துப்பொடிக்க

மிளகு ஒரு டீஸ்பூன்

மி.வத்தல் 2

அரைக்க

ஜீரகம் ஒரு டீஸ்பூன்,

தேங்காய்த் துருவல் ஒரு டேபிள் ஸ்பூன் (தேவையானால் ஒரு டீஸ்பூன் அரிசி மாவு அரைக்கையில் சேர்க்கலாம்.)

தாளிக்க தே. எண்ணெய் கடுகு, உபருப்பு, அரை மி.வத்தல், கருகப்பிலை, கொத்துமல்லி, பெருங்காயத் தூள்
 ஓர் சட்டியில் அல்லது உருளி அல்லது சமைக்கும் பாத்திரத்தில் ஓர் முட்டை எண்ணெய் ஊற்றிக் கொண்டு முள்ளங்கிக்கீரையை நன்கு வதக்கவும். தேவையான நீர் சேர்த்து மஞ்சள் பொடி போட்டு வேக வைக்கவும். வெந்ததும் பாசிப்பருப்பைச் சேர்க்கவும். கொதிக்கையில் வறுத்துப் பொடித்து வைத்த மிளகாய்வத்தல், மிளகுப்பொடியை உங்கள் காரத்துக்கு ஏற்பச் சேர்க்கவும். உப்பையும் சேர்க்கவும். ஐந்து நிமிஷம் கொதித்த பின்னர் சீரகம், தேங்காய்த் துருவல் சேர்த்து அரைத்து வைத்திருக்கும் விழுதைச் சேர்க்கவும். கொதித்ததும் கீழே இறக்கித் தேங்காய் எண்ணெயில் கடுகு, உ.பருப்பு. மி.வத்தல், கருகப்பிலை, பெருங்காயம் சேர்த்துத் தாளிக்கவும். கீரை வேகும்போதே பிடிக்கும் எனில் ஊற வைத்த மொச்சை அல்லது கொண்டைக்கடலையைச் சேர்க்கலாம். நான் பொதுவாகப் பொரிச்ச குழம்பு, புளி விட்ட குழம்பு, கூட்டு வகைகளுக்கு அப்போதே வறுத்துக் காய்கள் வேகும்போது சேர்ப்பேன். வெந்து விடும். இது அவரவர் வீட்டுப் பழக்கம் மற்றும் விருப்பம்.

உணவே மருந்து! முள்ளங்கிக்கீரை 2

முள்ளங்கிக் கீரையைப் பல விதங்களில்சமைக்கலாம். பொதுவாகச்செய்வது முள்ளங்கிக் கீரை ஒருகட்டு எடுத்துக் கொண்டு அதை அடி நரம்பு நீக்கிவிட்டுப் பொடியாக நறுக்கிக் கொள்ளவும். கடாயில் அல்லது வாணலியில் பாசிப்பருப்பை நன்கு அலம்பிக் களைந்து போடவும். ஒரு கட்டு முள்ளங்கிக் கீரைக்கு அரைக் கரண்டி பாசிப்பருப்புப் போதும். அல்லது ஒரு டேபிள் ஸ்பூன் எனக் கணக்கு வைச்சுக்கவும். கீரையையும் நன்கு அலசி அலம்பிச்சேர்க்கவும். கீரை வேக நேரம் எடுக்கும் என்பதால் பாசிப்பருப்புடனேயே போடலாம். மஞ்சள் பொடி சேர்க்கவும். நான் எல்லாவற்றுக்கும் மஞ்சள் பொடி தாராளமாகவே சேர்ப்பேன். உடலுக்கு நல்லது. நல்ல ஆன்டி பயாடிக்!

சிறிது நேரம் கழித்துப் பருப்பு வெந்து விட்டதா எனப் பார்த்தால் பருப்பு நசுங்கும் பதம் வந்திருக்கும். அப்போது  உப்புச் சேர்க்கவும். உப்புச் சேர்த்து ஐந்து நிமிஷம் போல் வேக விடவும். வேக வைத்த நீரை வடிகட்டித் தனியாக வைக்கவும். அதில் தக்காளிச் சாறு சேர்த்து மிளகு, ஜீரகம் போட்டுப் பாலேடு போட்டோ அல்லது வெண்ணெய் போட்டோ சூப் மாதிரிக் குடிக்கலாம். வெந்தகீரையைத் தனியாக வைக்கவும். கடாயில் தாளிக்கத் தேவையான எண்ணெய் ஊற்றிக் கொள்ளவும், கடுகு, உளுத்தம்பருப்பு, (பிடித்தால் சீரகம்) சேர்க்கவும். பெருங்காயத் தூள் போட்டு மேற்சொன்ன அளவுக் கீரைக்கு ஒரு மி.வத்தல், கருகப்பிலை போட்டுத் தாளிக்கவும். வெந்து எடுத்த கீரையைப் போடவும். கீரையில் கொஞ்சம் ஜலம் இருக்கும். பிழிந்தெல்லாம் எடுக்க வேண்டாம். அதோடு போடுங்க! வதக்கும்போது ஜலம் வற்றி விடும்.

கீரையைப் போட்டு ஒரு வதக்கு வதக்கிக் கொண்டு ஒரு டீஸ்பூன் சர்க்கரை (கீரையின் துவர்ப்பை எடுக்கும்.) சேர்த்துத் தேங்காய்த் துருவலும் சேர்க்கவும். அடியில் உள்ள ஜலம் வற்றும் வரை அடுப்பில் வைத்துக் கிளறிக் கொடுக்கவும்.பொதுவாக எல்லாக் கீரைகளுக்குமே நான் என்ன செய்தாலும் தே.எண்ணெயில் தான் தாளிப்பேன். அது உங்க சௌகரியம் போல் செய்யவும். நன்கு கிளறியதும் கீரையைச் சூடான சாதத்துடன் சாப்பிடலாம். வத்த்க்குழம்பு, சாம்பார் எதுவாக இருந்தாலும் ஓகே!

அடுத்த முறை

முள்ளங்கிக்கீரை ஒரு கட்டு

உருளைக்கிழங்கு ஒன்று நன்கு வேக வைத்துக்கொள்ளவும்

தேங்காய்த் துருவல் ஒரு டேபிள் ஸ்பூன்

மி.வத்தல் அல்லது மி.பொடி அவரவர் விருப்பம் போல்

மி.பொடி வேண்டாம்னா சாம்பார்ப் பொடி ஒரு டீஸ்பூன்

வெங்காயம் ஒன்று பொடியாக நறுக்கியது

ஜீரகம், அரைக்க ஒரு டீஸ்பூன்,  தாளிக்க ஒரு டீஸ்பூன், கடுகு தாளிக்க

மஞ்சள் பொடி, உப்பு

தக்காளி ஒன்று, பச்சை மிளகாய், இஞ்சி மூன்றையும் ஒன்றிரண்டாக மிக்சியில் அடித்துஎடுக்கவும்.

தாளிக்க நெய் அல்லது எண்ணெய் அவரவர் விருப்பம் போல்

உருளைக்கிழங்கை நன்கு வேக வைத்துப் பொடியாக நறுக்கவும்.கீரையையும் பொடியாக நறுக்கி நன்கு அலம்பி வைக்கவும். தேங்காய்த் துருவலோடு சாம்பார்ப் பொடி அல்லது மி.பொடி அல்லது மி.வத்தல் போட்டு ஜீரகத்தையும் சேர்த்து மிக்சி ஜாரில் போட்டு அரைக்கவும்.

கடாயில் நெய் அல்லது எண்ணெய் ஊற்றிக் கொண்டு கடுகு , ஜீரகம் தாளிக்கவும். மஞ்சள் பொடி சேர்த்துக் கொண்டு  பச்சை மிளகாய், இஞ்சி, தக்காளிக்கலவையைப் போட்டு வதக்கவும். வெங்காயத்தையும் சேர்த்து வதக்கவும். வெங்காயம் வதங்கிய பின்னர் கீரையைப் போட்டு சற்று வதக்கவும். நறுக்கிய உருளைக்கிழங்குத் துண்டுகளை சேர்த்து அதோடு அரைத்த விழுதைச் சேர்த்துத் தேவையான உப்பையும் போட்டு ஒரு தட்டால் மூடி வேக வைக்கவும். கீரை வேகக் கொஞ்சம் நேரம் ஆகும். ஆகவே நிதானமான தீயில் வேக வைக்கவும். அடிக்கொரு தரம் தட்டைத் திறந்து கிளறிக் கொடுக்கவும். கீரையும் உருளைக்கிழங்கும் நன்கு வெந்து கறி பதத்துக்கு வந்ததும் கீழே இறக்கவும். சப்பாத்தி, சாதம் எல்லாவற்றோடும் சாப்பிடலாம். எந்தக் கீரையையும் இம்மாதிரிப் பண்ணலாம் எனினும் முள்ளங்கி, முருங்கை போன்றவை அரிதாகச் செய்வதால் அவற்றில் இம்மாதிரிச் செய்யலாம். 

உணவே மருந்து! முள்ளங்கிக் கீரை!

நன்றி கூகிளார்

முள்ளங்கியின் சிறப்பு மிகச் சிறப்பு! முக்கியமாய் நீரிழிவு உள்ளவர்களுக்கு அருமருந்தாகும். தினம் முள்ளங்கியை சாலடாகச் சாப்பிட்டு வரலாம். அல்லது சாறு பிழிந்து சாப்பிடலாம். வட மாநிலங்களில் முள்ளங்கி பயிராகும் பருவத்தில் பெரிய முள்ளங்கியை அப்படியே கடித்துச் சாப்பிடுவார்கள். போன புதுசிலே அதைப் பார்த்தால் ஆச்சரியமா இருக்கும். முள்ளங்கியை சாம்பார் தான் அதிகம் செய்து பார்த்திருக்கேன். அதுவுமே பிறந்த வீட்டில் அப்பாவுக்கு அந்த வாசனையே பிடிக்காது என்பதால் அவர் இல்லாத சமயங்களில் தான் அம்மா செய்வார். அப்புறமாக் கல்யாணம் ஆகி வந்தும் முள்ளங்கி சாம்பார் தான் செய்திருக்கேன். சொல்லப் போனால் இலையோடு முள்ளங்கியைப் பார்த்ததே இல்லை. முதல் முறையாக எழுபதுகளில் ராஜஸ்தான் போனப்போத் தான் முள்ளங்கியைக் கீரையோடு பார்த்தேன். வீட்டிலும் பயிராக்கினோம். கீரையைப் பயன்படுத்துவார்கள் என்பது தெரியாததால் சந்தையிலிருந்து முள்ளங்கி வாங்கி வரும்போதே கீரையை நறுக்கிவிட்டுத் தரச் சொல்லுவேன். அவங்க விசித்திரமாய்ப் பார்ப்பாங்க! பின்னர் தான் அதை வைத்துப் பல சமையல்கள் செய்யலாம் என்பதே புரிந்தது.

முள்ளங்கியில் ரொட்டி செய்வார்கள் என்பதும் அப்போது தான் புரிந்தது. முள்ளங்கிக்கீரை, கடுகுக்கீரை, ஸ்பினாச் எனப்படும் பாலக் மூன்றும் போட்டு சர்ஸோன் கா சாக் என்னும் உணவு தயாரிப்பார்கள். பெரும்பாலும் அதில் கடுகுக்கீரையே முக்கிய இடம் பெற்றாலும் சிலர் முள்ளங்கிக்கீரையையும் அதில் சேர்ப்பார்கள். கீரையைப் பொடியாக நறுக்கி வெங்காயம் தக்காளி போட்டு வதக்கிக் கூட்டுப் போல் பண்ணுவார்கள். கடலைமாவில் உப்பு, காரம், கரம் மசாலா போட்டு எண்ணெய், நீர் சேர்த்துப் பிசைந்து அதில் கீரையை நறுக்கிப் போட்டு பகோடா தயாரிப்பார்கள். ஆவியில் வேக வைத்து பருப்புசிலி போலும் பண்ணுவார்கள். பாலக் கீரை, வெந்தயக் கீரை, முள்ளங்கிக்கீரை எல்லாமும் சேர்த்துப் போட்டு பஜியா எனப்படும் தூள் பஜ்ஜி வட மாநிலங்களில் மிகப் பிரபலம்.

அதுக்கு மேலே காரட், முள்ளங்கித் துருவல் எலுமிச்சம்பழம் பிழிஞ்சு உப்புச் சேர்த்துக் கடுகு தாளித்துச் சேர்த்து பச்சை வெங்காயத்தையும் துருவிக் கொடுப்பார்கள். 50 கிராம் பஜியா சாப்பிட்டால் வயிறு நிறைந்து விடும். இப்படி நாம் வேண்டாம் எனச் சொல்லும் கீரை வகைகள் நிறைய இருக்கு. எல்லாவற்றையும் வடக்கே பயன்பாட்டிலும் இருக்கு. வெந்தயக்கீரை கூட எனக்கு அங்கே போய்த் தான் தெரியும். கொஞ்சம் கசப்பு இருக்கும் என்பதால் நாம் தவிர்க்கிறோமோ என்னமோ! ஆனால் நாங்க பாகற்காய் கூடச் சாறு எடுத்துச் சாப்பிடுவதால் கசப்புத் தெரிவதில்லை. முள்ளங்கிக்கீரையைப் பாசிப்பருப்புப் போட்டு தேங்காய், ஜீரகம் அரைத்து விட்டுக் கூட்டாகவும் செய்யலாம்.மிளகு வறுத்து அரைத்துப்பொரிச்ச குழம்பும் பண்ணலாம். முள்ளங்கியின் பயன்களை முதலில் பார்த்துவிட்டுப் பின்னர் முள்ளங்கியிலிருந்து தயாரிக்கும் உணவு வகைகளை ஒவ்வொன்றாகப் பார்ப்போம்.

முக்கியமாய் வாதம் அதிகம் உள்ளவர்கள் சாப்பிட வேண்டாம். சிறுநீரகக் கற்கள் கரைய இது அருமருந்து. கால்சியம், இரும்பு, வைடமின் ஏ,பி,சி மற்றும் புரதச் சத்து இருப்பதால் சிறு குழந்தைகளுக்கு ஒரு முள்ளங்கி வில்லையை வேக வைத்து நன்கு பருப்பு சாதத்தோடு மசித்துக்கொடுக்கலாம். அதோடு இது விலை எப்போவும் உயராது! விலை குறைவாகவே இருக்கும். 

உணவே மருந்து! தூதுவளை!

தூதுவளை கற்ப மூலிகைகளில் ஒன்றாகும். உடலை வலுவாக்கிக்கல் போல் ஆக்கும் மூலிகைகள் சிலவற்றில் தூதுவளையும் ஒன்று. கற்பம் என்றால் உடலில் நோய் எதிர்ப்புத் திறனை அதிகரிக்கச் செய்து நோய் அணுகாதவண்ணம் செய்து நோய்களில் இருந்து விடுபட வைக்கும் என்ற பொருள் ஆகும். காயகற்பம் என்பார்கள். காயம் என்றால் உடம்பு.  இத்தகைய காயகற்ப மருந்தைச் சாப்பிடும்போது உடல் தூய்மை மட்டுமில்லாமல் உள்ளத் தூய்மையும் சாப்பிடும் மருந்தில் நம்பிக்கையும் இருத்தல் வேண்டும். பொதுவாகவே மருத்துவரிடம் செல்லவும், மருந்துகளை எடுத்துக் கொள்ளவும் நல்ல நாள் பார்ப்பார்கள். இந்தக் காயகற்ப மருந்துகளுக்கும் அவ்வாறே நல்ல நாள் பார்க்க வேண்டும். ஆரம்பத்தில் சிறிதாக எடுத்துக் கொண்டு நாள் ஆக, ஆக அதிகரிக்க வேண்டும். தொடர்ந்து ஒரு மண்டலம் 48 நாட்கள் சாப்பிட வேண்டும். இத்தகைய மருந்துகள் சாப்பிடும்போது அகத்திக்கீரை உண்ணக் கூடாது.

தூதுவளையும் இந்தியா முழுவதும் கிடைக்கும் கீரைகளில் ஒன்று.  சிங்கவல்லி, அளர்க்கம் என்னும் பெயர்களிலும் அழைக்கப்படும். அநேகமாக வேலியோரச் செடியாகவே வளரும். இதில் முட்கள் காணப்படும். இதன் இலை, பூ, காய், வேர் எல்லாமும் மருத்துவ குணம் உள்ளது. முக்கியமாகச் சளி, ஜலதோஷத்துக்கு நல்ல மருந்து. தூதுவளை இலையுடன், துளசியும் சேர்த்துக் கஷாயம் வைத்துச் சாப்பிட்டால் தொண்டைக்கரகரப்பு, தொண்டை வலி, தொண்டைப்புண் ஆகியவற்றுக்கு நிவாரணம் கிடைக்கும்.  தூதுவளை இலையுடன் , மிளகு, சின்ன வெங்காயம், பூண்டு சேர்த்து வதக்கி உப்பு சேர்த்துத் துவையல் அரைத்துச் சாதத்துடன் கலந்து சாப்பிடலாம்.  இடைவிடாத இருமல், இரைப்பு போன்றவற்றுக்கு இது நல்லது. ஆண்களுக்கு இது மிகுந்த சக்தியைக் கொடுக்கும். எலும்புக்கும் பற்களுக்கும் இது நன்மை பயக்கும் என்பதால் பருப்புடன் சேர்த்துச் சமைத்து நெய்யில் தாளிதம் செய்து சாப்பிடலாம். 48 நாட்கள் தொடர்ந்து சாப்பிட வேண்டும்.

இதன் பொடியையும் தொடர்ந்து தேனில் கலந்து சாப்பிட வேண்டும். இலையை அரைத்து அடை போல் செய்தும் சாப்பிடலாம். இதனால் இரைப்பு நோய்க்கு நிவாரணம் கிடைக்கும். மூக்கில் நீர் வடிதல், வாயில் அதிக நீர் சுரப்பு,  பல் ஈறுகள், சூலை நீர் ஆகியவற்றுக்கு இது சிறந்த மருந்தாகும்.  தூதுவளைக் காயைச் சமைக்கலாம். அல்லது வற்றலோ, ஊறுகாயோ போடலாம். கண்களுக்கு நல்லது. தூதுவளைப் பூவை உலர்த்திப்பொடியாக்கிப் பாலில் கலந்து சாப்பிட்டு வந்தால் ஆண்மை சக்தி அதிகரிக்கும். பழத்தை வெயிலில் காய வைத்துப் பொடியாக்கித் தேன் கலந்து சாப்பிட்டால் மார்புச் சளி, இருமல் குணமாகும். விஷத்தை முறிக்கும். மலச்சிக்கல் நீங்கும். கீரை, வேர்,காய் இவற்றை வற்றலாகவோ ஊறுகாயாகவோ செய்து சாப்பிட்டால் கண் சம்பந்தப்பட்ட நோய்கள் நீங்கும். இலையைக் குடிநீர் செய்து அருந்தி வரலாம்.

தூதுவளையை அடிக்கடி பயன்படுத்தினால் புற்று நோய் வராமல் தடுக்கும் என்கின்றனர். சித்த வைத்திய முறையில் தூதுவளையைப் பயன்படுத்தித் தயாரிக்கப்படும் நெய் மிகவும் சிறப்பானதாகக் கூறப்படுகிறது. தூதுவளை நெய்யை ஒரு தேக்கரண்டி அளவு தினமும் சாப்பிட்டு வந்தால் எலும்புருக்கி நோய், ஈளை நோய், கப நோய், மேக நோய், வெப்ப நோய், இரைப்பு, இருமல், வாய்வு, குண்டல வாய்வு போன்றவைக்கு நல்ல நிவாரணம் கிடைக்கும்.  தூதுவிளங்காயிலும் சத்துக்கள் இருப்பதால் அதையும் சமைத்துச் சாப்பிடலாம். பித்தத்திற்கு நல்லது.

தூதுவளை ரசம் செய்முறை: இதற்குச் சிலர் பூண்டு சேர்க்கின்றனர். பொதுவாக நான் பூண்டைக் குறைவாகவே பயன்படுத்துவதால் பூண்டு இல்லாமலேயே இங்கே கொடுக்கிறேன். நான்கு பேருக்கு!

தூதுவளை இலைகள் ஒரு கைப்பிடி அல்லது 50, 60 இலைகள்

மி.வத்தல் இரண்டு, மிளகு ஒரு டீஸ்பூன், துவரம்பருப்பு ஒரு டீஸ்பூன், ஜீரகம்

பெருங்காயம் ஒரு துண்டு, மஞ்சள் பொடி அரை டீஸ்பூன்

புளி ஒரு சின்ன எலுமிச்சை அளவு (இதில் தக்காளி சேர்க்க வேண்டாம்)
உப்பு தேவையான அளவு
தாளிக்க நெய் ஒரு தேக்கரண்டி. கடுகு அரை டீஸ்பூன், மிவத்தல் பாதி, கருகப்பிலை, ஜீரகம்.

ஒரு வாணலியில் சமையல் எண்ணெய் ஊற்றிக் கொண்டு மி.வத்தல், துவரம்பருப்பு, மிளகு போட்டு, பெருங்காயமும் சேர்த்து வறுத்து எடுத்துத் தனியாக வைக்கவும்.அந்தச் சட்டியிலேயே தூது வளை இலைகளைப் போட்டு வதக்கவும். ஜீரகத்தை வறுக்க வேண்டாம். பச்சையாகச் சேர்த்து அரைக்கவும். ஆறியதும் மிக்சி ஜாரில் போட்டு அரைக்கவும். அம்மி இருந்தால் நல்லது தான். ஆனால் இந்தக் காலத்தில் எங்கே போறது!

புளியைக் கரைத்து ஈயச் செம்பு அல்லது ஏதேனும் ஒரு பாத்திரத்தில் விட்டுத் தேவையான உப்புச் சேர்த்து மஞ்சள் பொடி போட்டுக் கொதிக்க வைக்கவும். புளி வாசனை போகக் கொதித்ததும் அரைத்த விழுதைப்போட்டுக்கொதி விடவும். மேலே நுரைத்து வரும்போது அடுப்பை அணைத்து விட்டுக் கீழே இறக்கி நெய்யில் கடுகு, ஜீரகம், மி.வத்தல், கருகப்பிலை போட்டுத் தாளிக்கவும்.

உணவே மருந்து! பருப்புக்கீரை!

இந்தப் பருப்புக்கீரை இயற்கையாக இந்தியா முழுவதிலும் விளைகிறது. இதன் மருத்துவத் தன்மைக்காக இது வளர்க்கவும் படுகிறது.  இது மணமற்றக் குறுஞ்செடியாக சுமார் 90 செ.மீ உயரம் வரை வளரும் இயல்பு கொண்டது. இது உடல் வெப்பம் மிகுந்தவர்களுக்குத் தக்க பலன் கொடுக்கக் கூடியது. இதை நன்கு அரைத்து உடலில் அக்கி கண்ட இடத்தில் அடர்த்தியாகத் தடவி வர வேண்டும். எட்டு மணி நேரத்துக்கு ஒரு முறை இம்மாதிரித் தடவலாம். அப்படித் தடவி வந்தால் உடனடியாக அக்கியிலிருந்து நிவாரணம் கிடைப்பதோடு அக்கி வந்ததால் ஏற்படும் தழும்புகளும் மறையும். உடலில் வெப்பம் தணிந்து குளிர்ச்சி உண்டாகும். இந்தப் பருப்புக்கீரை இலைகளை வெந்நீர் விட்டு அரைத்து நெற்றி, பிடரி, கழுத்துப் பகுதிகளில் பற்றாகப் போட்டு வந்தால் தீராத தலைவலி குணமாகும். சாறை உடலில் தடவிக் கொண்டு குளித்தால் வியர்க்குரு வராது என்பதோடு வந்திருந்தாலும் பட்டுப் போகும்.  தீப்புண், சொறிசிரங்கு போன்றவற்றிற்கும் இது நல்லதொரு நிவாரணி ஆகும். புண்கள் செப்டிக் ஆகாமல் தடுத்து ஆற வைக்கும். 

மலச்சிக்கல் இருக்கும் குழந்தைகள் முதியவர்களுக்கு மலச்சிக்கல் தீரப் பருப்புக்கீரையைச் சமைத்துக் கொடுக்கலாம். பருப்புக்கீரைச் செடியை நன்கு கழுவி அலசிக்கொண்டு இளநீரோ மோரோ விட்டு முழுச்செடியையும் அரைத்து நெல்லிக்காய் அளவுக்கு எடுத்துக் கொண்டு காலை வெறும் வயிற்றில் நீராகாரத்துடன் சாப்பிட்டு வந்தால் குடல் பிரச்னைகள் தீரும். முக்கியமாய் மஞ்சள்காமாலை குணமாகும். நீர்க்கடுப்பு, எரிச்சல், ஆகியன நீங்கும். இதன் விதைகளையும் பொடி செய்து இளநீருடன் சேர்த்துச் சாப்பிட்டு வந்தால் உடல் பலஹீனம் நீங்கும். இந்தக்கீரையில் புரதம், கொழுப்புச் சத்து, தாதுச் சத்துக்கள், நார்ச்சத்து, கார்போஹைட்ரேட், கால்சியம், பாஸ்பரஸ், இரும்புச் சத்து ஆகியவை உள்ளன. 

பருப்புக்கீரை சமையல்

பருப்புக்கீரை ஒரு கட்டு

பாசிப்பருப்பு சின்னக் கிண்ணம் ஒன்று

தேங்காய்த் துருவல் ஒரு டேபிள் ஸ்பூன்

மி.வத்தல் ஒன்று, ஜீரகம் ஒரு டீஸ்பூன்

உப்பு தேவையான அளவு

தாளிக்க தே.எண்ணெய் (பொதுவாய்க்கீரை வகைகளுக்கே தே.எண்ணெயில் தாளித்தால் நன்றாக இருக்கும்.)

கடுகு, உபருப்பு

கீரையை நன்கு அலசிப் பொடியாக நறுக்கி வேக விடவும். பருப்பைத் தனியாகக் குழைவாக வேக வைத்துக் கொள்ளவும். கீரையும் நன்கு வெந்தபின்னர் பருப்பைச் சேர்த்து மத்தால் நன்கு மசிக்கவும். தேவையான உப்பைச் சேர்க்கவும்.  தேங்காய்த் துருவலோடு மிளகாய் வற்றலையும் ஜீரகத்தையும் சேர்த்து நன்கு நைசாக அரைத்துச் சேர்க்கவும். ஒரு கொதி விடவும். கீரையில் தண்ணீர் அதிகம் இருந்தால் எடுத்துத் தனியாக வைக்கவும்.  பின்னர் அதில் மிளகுபொடி,பெருங்காயப் பொடி சேர்த்து நெய் அல்லது வெண்ணெய் போட்டு சூப் போல் குடிச்சுக்கலாம்.

கீரைக்கு அரைத்த விழுதைச் சேர்த்துக் கொதி வந்ததும் கீழே இறக்கித் தே. எண்ணெயில் கடுகு, உபருப்புத் தாளிக்கவும். கீரை மொளகூட்டல் என்றே இதைச் சொல்லலாம்.

இம்முறையில் மிவத்தல் சேர்க்காமல் மி.பொடி சேர்த்து, வெங்காயம், பூண்டு வதக்கிச் சேர்த்தும் பண்ணலாம். இதற்குப் பச்சை மிளகாய் தாளிதத்தில் சேர்க்கலாம்.  சிலர் கீரையைக்குக்கரில் வேக வைக்கின்றனர். அது அவ்வளவு நல்லது இல்லை. இதை நன்கு வேக விட்டுக் கொண்டு புளி சேர்த்து சாம்பார்ப்பொடி போட்டு, துவரம்பருப்புச் சேர்த்துக் கொதிக்க விட்டுக் கொண்டு, சின்ன வெங்காயம், பூண்டு (பிடித்தால்) பச்சை மிளகாய், மி.வத்தல், கடுகு, வெந்தயம், கருகப்பிலை தாளித்துச் சேர்த்து சாதத்தோடு சாப்பிடலாம். 

உணவே மருந்து! வல்லாரை!

வல்லாரை

ஞாபக சக்திக்குப் பயன்படும். வல்லாரை சாப்பிட்டால் நினைவாற்றல் அதிகரிக்கும் என்பார்கள். இதை வதக்கித் துவையலாக அரைத்துச் சாப்பிடலாம் என்பார்கள். நீர் அதிகம் இருக்கும் பகுதிகளிலேயே தானாக வளர்ந்திருக்கும். இதுவும் ஒரு கீரை வகையாகவே கருதுவார்கள். நினைவாற்றலை அதிகரிக்கச் செய்வதால் "சரஸ்வதி கீரை" என்னும் பெயரும் இதற்கு உண்டு. இதில் இரும்புச் சத்து, சுண்ணாம்புச் சத்தி, வைடமின்கள் ஏ, சி ஆகியன உள்ளன. தாது உப்புக்கள் நிறைந்ததும் கூட. ரத்தத்தை சுத்தம் செய்யும் தன்மை உள்ளது இந்தக் கீரை! உடல் புண்கள், தொண்டைக்கட்டு, காய்ச்சல் போன்றவற்றைக் குணப்படுத்தும். கபம் நீங்கும். பல் துலக்கினால் மஞ்சள் நிறம் மாறிப் பற்கள் பளிச்சிடும்.

காலை வேளையில் வெறும் வயிற்றில் அப்போது தான் பறித்த கீரையை வாயிலிட்டு மென்றால் மூளை நன்கு செயல்படும். அதன் பின்னர் பசும்பால் குடித்தால் மாலைக்கண் நோய் குணம் ஆகும். இந்தக்கீரையுடன் மிளகு சேர்த்து உண்டால் உடல் குளிர்ச்சி அடையும். சூடு தணியும்.  ஆனால் இதற்குப் பத்தியம் உண்டு. அகத்திக்கீரை, பாகல் காய் போன்றவற்றை அறவே தவிர்க்க வேண்டும். இது உண்ணுவது பொதுவாக அரிதாகக் காணப்படும் இக்காலத்தில் சித்த மருத்துவத்தில் சூரணம், லேகியம், மாத்திரை ஆகிய வடிவங்களில் பக்குவம் செய்து சித்த மருத்துவர்கள் தருகின்றனர்.

இதன் இலைகளைப் பறித்து நிழலில் உலர்த்திப் பொடி செய்து இரவில் தினமும் பசும்பாலில் கலந்து அருந்தினால் வயிர்ருப் பூச்சிகள் ஒழியும்.  இலைகளைச் சுத்தம் செய்து சின்ன வெங்காயம், பூண்டு , மிளகு சேர்த்து அரைத்து உப்புச் சேர்த்துத் துவையலாகச் சாப்பிடலாம். ஒரு மண்டலம் சாப்பிட்டு வந்தால் மூளைச் சோர்வு நீங்கி புத்துணர்ச்சி பெறும். நினைவாற்றல் அதிகரிக்கும். வல்லாரை ஒரு பங்குடன் கீழா நெல்லி ஒரு பங்கு சேர்த்து அரைத்துச் சாறை அருந்தினால் நீர்க்கடுப்பு, நீர் எரிச்சல் தீரும். இந்தக் கீரை மலச்சிக்கலை அகற்றுகிறது. நீரிழிவு நோய்க்கு மிக அரிய மருந்தாகும் இது.  யானைக்கால் வியாதி, விரை வீக்கம், வாயு வீக்கம், கட்டிகள் ஆகியவற்றின் மீது இந்தக்கீரையை நன்கு அரைத்துக் கட்டினால் குணம் தெரியும். இதை முறைப்படி எண்ணெய் காய்ச்சித் தலைக்குத் தேய்த்துக் குளித்து வந்தால் உடல் சூடு தணியும்.  வாய்ப்புண்ணால் அவதிப் படுபவர்கள் வல்லாரை இலையைப் பச்சையாக மென்று தின்றால் நல்ல குணம் தெரியும்.

அதோடு இந்தக்கீரையைச் சமைக்கையில் புளி சேர்க்கக் கூடாது. புளி சேர்த்தால் அதன் மருத்துவ குணம் மாறி விடும். சிறுநீர் மஞ்சளாகப் பிரிந்தாலும் வல்லாரை சிறந்த நிவாரணியாகப் பயனாகிறது. இதனுடன் வெங்காயம், மிளகு, சீரகம் சேர்த்து பாசிப்பருப்புப் போட்டு சாம்பார் மாதிரிச் செய்து சாப்பிடலாம். பாசிப்பருப்புடன் தேங்காய், மிளகு, சீரகம் சேர்த்துக் கூட்ட்டாகவோ பொரிச்ச குழம்பாகவோ செய்து சாப்பிடலாம். வல்லாரை, உளுத்தம்பருப்பு, தேங்காய் போன்றவற்றை வதக்கிக் கொண்டு அதனுடன் உப்புச் சேர்த்து மிளகு போட்டுத் துவையல் செய்தும் சாப்பிடலாம்.