எச்சரிக்கை

படிக்கும் அன்பர்கள் பதிவுகளை வேறெங்கும் காப்பி,பேஸ்ட் செய்து போடவேண்டாம் எனக் கேட்டுக் கொள்ளப் படுகிறார்கள்.

Friday, July 15, 2016

உணவே மருந்து! நாரத்தங்காய்!

இப்போ நாரத்தங்காயில் குழம்பு பண்ணும் விதம் கொடுக்கப் போகிறேன். ஒரு நல்ல ஜாதி நாரத்தங்காயை எடுத்துக் கொள்ளவும். இரண்டாக நறுக்கிக் கொண்டு ஒரு பாதியின் சாறைப் பிழிந்து தனியாக வைக்கவும். ஒரு அரை டீஸ்பூன் உப்பை அந்தச் சாறில் கலந்து வைக்கவும். மீதிப் பாதியோடு சாறு பிழிந்ததின் தோலையும் சேர்த்துப் பொடியாக நறுக்கிக் கொள்ளவும்.

ஒரு எலுமிச்சை அளவு புளியை ஊற வைத்துக் கரைத்துக் கொள்ளவும். இரண்டு கிண்ணம் இருக்கலாம். கல்சட்டி அல்லது வாணலியை அடுப்பில் ஏற்றிக் கொண்டு அதில் நல்லெண்ணெய் ஊற்றிக் கொள்ளவும். எண்ணெய் காய்ந்ததும் கடுகு, உ,பருப்பு, கபருப்பு, துபருப்பு ஆகியன தலா ஒரு டீஸ்பூன், மி.வத்தல் 2, கருகப்பிலை, பெருங்காயம் போட்டுத் தாளிக்கவும். நறுக்கிய நாரத்தங்காய்த் துண்டங்களைப் போட்டு வதக்கவும். குழம்புப் பொடி இரண்டு டீஸ்பூன் போட்டு நாரத்தங்காய்த் துண்டங்களோடு வதக்கிக் கொண்டு கரைத்த புளிக்கரைசலை ஊற்றி உப்புச் சேர்க்கவும். நன்கு கொதிக்கட்டும். சேர்ந்து வரும்போது ஒரு சின்னத் துண்டு வெல்லம் சேர்க்கவும். கீழே இறக்கி சூடான சாதத்தில் நல்லெண்ணெய் ஊற்றிச் சாப்பிடவும்.

நாரத்தை இலைகளைக் கொஞ்சம் இளசாக இருக்கும்போதே பறித்து நன்கு கழுவி நிழலில் உலர்த்திக் கொள்ளவும். ஒரு கிண்ணம் நிறைய இலைகள் இருந்தால் அவற்றிற்குத் தேவையான அளவு சாமான்கள் கீழ்க்கண்டவாறு எடுத்துக் கொள்ளவும். கருகப்பிலையும், எலுமிச்சை இலையும் கூட இருந்தால் நல்லதே!

பத்து அல்லது பனிரண்டு மிளகாய் வற்றல்

வெள்ளை உளுத்தம்பருப்பு ஒரு டேபிள் ஸ்பூன்

உப்பு தேவையான அளவு

ஓமம் இரண்டு டீஸ்பூன் (இதற்குப் பெருங்காயம் வேண்டாம்)

ஒரு சிலர் புளி, பெருங்காயம் சேர்ப்பார்கள். சேர்த்தாலும் தவறில்லை. புளியையும் வெறும் வாணலியில் பிரட்டிக் கொண்டு இலைகளை அரைக்கையில் சேர்த்து அரைக்க வேண்டும்.

இவை எல்லாவற்றையும் வெறும் வாணலியில் வறுத்துக் கொண்டு பின்னர் அதே வாணலியில் இலைகளையும் போட்டுச் சூடு வரப் பிரட்டிக் கொள்ளவும். ஆறியதும் மிக்சி ஜாரில் போட்டு அரைத்து எடுத்துக் கொள்ளவும். வாயில் ருசி இல்லாமல் இருந்தாலோ அல்லது வாந்தி வரும்போல் இருந்தாலோ இந்தப் பொடியை வாயில் போட்டுக் கொள்ளலாம். அல்லது சூடான சாதத்தில் ஒரு ஸ்பூன் நல்லெண்ணெயுடன் பொடி சேர்த்துக் கலந்து உண்ணலாம். மோர் சாதத்திற்குத் தொட்டுக் கொள்ளலாம். கரைத்த மோரில் இந்தப் பொடியை ஒரு ஸ்பூன் போட்டுக் கரைத்துக் குடிக்கலாம்.

தேவையான பொருட்கள்: நாரத்தை இலைகள் இரண்டு பெரிய கிண்ணங்கள், எலுமிச்சை இலையும் சம அளவு. செடிகளிலிருந்தும் கொடிகளிலிருந்தும் பறித்துச் சுத்தம் செய்து நரம்பை நீக்கி வைத்துக்கொள்ளவும்.

மேலே சொன்ன அளவிற்குக் காரம் வேண்டுமெனில் 15 முதல் 20 மிளகாய் வற்றல், ஓமம் ஒரு டேபிள் ஸ்பூன், பெருங்காயம் ஒரு சின்னக் கட்டி அல்லது தூள் ஒரு டீஸ்பூன், உப்பு தேவையான அளவு.

மேலே சொன்ன சாமான்களை நன்கு வெறும் வாணலியில் வறுத்துக்கொள்ளவும். வாணலிச் சூட்டிலேயே நாரத்தை, எலுமிச்சை இலைகளைப் போட்டுக்கொண்டு சூடானதும், எல்லா சாமான்களையும் மிக்சியில் போட்டு அரைக்கவும். அல்லது இடித்தும் வைத்துக்கொள்ளலாம்.

பச்சை நாரத்தங்காயைக் கழுவிக் கொண்டு வட்டமாகச் சுருள் சுருளாக வரும்படி நறுக்கிக் கொள்ளவும். நாரத்தங்காய் சுமார் பத்து இருந்தால் ஒரு கிண்ணம் உப்பு, ஒரு டேபிள் ஸ்பூன் மஞ்சள் தூள், ஒரு டேபிள் ஸ்பூன் பெருங்காயப் பொடி எடுத்துக் கொண்டு. மூன்றையும் ஒன்றாகக் கலந்து கொண்டு நாரத்தங்காய்ச் சுருளுக்குள் அடைத்து வைக்கவும். இரண்டு அல்லது மூன்று நாட்கள் அந்தச் சுருளைப் பாத்திரத்திலேயே வைத்துக் கிளறி விட்டு நல்ல வெயிலில் எடுத்துக் காய வைக்கவும். ரொம்பவும் காயவும் கூடாது. கையால் கிள்ளும் பதம் வந்ததும் எடுத்து வைக்கலாம். இதையே வெந்நீரில் ஊற வைத்துக் கொண்டு மிளகாய்ப்பொடி, கடுகு, வெந்தயப் பொடி சேர்த்து நல்லெண்ணெயில் கடுகு தாளித்துக் கார ஊறுகாயாகவும் பயன்படுத்தலாம். விருந்தினர் வரும்போது வீட்டில் ஊறுகாய் இல்லை எனில் கை கொடுக்கும்.

Thursday, July 14, 2016

உணவே மருந்து! நாரத்தங்காய்!

உண்மையில் நான் அடுத்து நெல்லிக்காய் குறித்தே எழுத இருந்தேன். அம்பி வந்ததும் நாரத்தங்காய் சாதம் செய்ததும் பற்றிச் சொல்லப் போக நாரத்தங்காய்க்கு எக்கச்சக்கமான விளம்பரம் கிடைச்சுடுத்து! ஆகவே நாரத்தங்காயைப் பத்தியே முதல்லே எழுதிடலாம்னு ஒரு எண்ணம்!

நாரத்தங்காய் மரமாக வளரக் கூடியது. எங்க அம்பத்தூர் வீட்டிலே இரண்டு உண்டு. காய்க்காமல் இருந்ததைப் பௌர்ணமி தினத்தன்று வேரில் வெட்டுப் போட்டுச் செருப்பால் அடித்துப் பின்னர் புட்டு நிவேதனம் செய்து காய்க்க வைத்தேன். நல்ல ஜாதி நாரத்தங்காய்! அங்கிருந்து கிளம்புகையில் மரத்தையே வெட்டியாச்சு! ரொம்பவே மனசுக்கு வேதனையா இருந்தது. என்ன செய்ய முடியும்! இப்போ விலை கொடுத்து நாரத்தங்காய் வாங்கறோம்.

நாரத்தங்காய் மரம் குறைந்த பட்சமாக நூறு வருடங்களுக்கு மேல் இருக்கும். இதன் வேரிலிருந்து பூக்கள், காய்கள், பழங்கள் எல்லாமும் பயன் தரக்கூடியவையே!  நாரத்தம்பழத்தில் வைடமின்களோடு மட்டுமில்லாமல் கொழுப்பு அமிலங்களும், அமினோ அமிலங்களும் இருக்கின்றன. அவை யாவன,  அஸ்கார்பிக் அமிலம், அலனைன், நியசின், வைட்டமின் பி, அஸ்பார்டிக் அமிலம், இனிசைன், குளுடாமிக் அமிலம், பெர்கமோட்டின், நாரிங்கின், சிட்ரல், லிமோனின், நார்டென்டாடின், வெலென்சிக் அமிலம் ஆகியன ஆகும்.

இதன் பூக்கள் தசையை இறுக்கமடைய வைக்கும். ஊக்குவிக்கும் சக்தி கொண்டது. வேர் வாந்தியைக் கட்டுப்படுத்தும். வயிற்றுப் புழுக்கள், மலச்சிக்கல் மற்றும் சிறுநீரகக் கல் போன்றவற்றிற்கும் மருந்தாகும். வயிற்றுப் புண்ணிற்கு நாரத்தங்காய் சிறந்த மருந்தாகும்.  இதன் தோல் வயிற்றுப் போக்கை நிறுத்தும். இதை எவ்வகையிலாவது உணவில் தினமும் சேர்த்து வர ரத்தம் சுத்தியடையும். வாதத்தை நீக்கி வயிற்றுப் புண்களை ஆற்றிப் பசியை அதிகரிக்கச் செய்யும்.  இதன் கனிகளைச் சாறு எடுத்துச் சாத்துக்குடி ஜூசைப் போல் குடிக்கலாம். கொஞ்சம் சர்க்கரை சேர்க்கவேண்டும். இந்தச் சாறு உடலுக்கும் வாய்க்கும் ரொம்பவே நன்மை தரும். வாயில் ஏற்படும் பித்தசம்பந்தமான நோய்கள் தீரும்.

உணவு ருசிக்காமல் இருந்தால் அதை ருசிக்கச் செய்யும் ஆற்றல் உள்ளது நாரத்தங்காய். இதைச் சாறாகவோ அல்லது ஊறுகாயாகவோ அல்லது சாதத்திலோ சேர்த்துச் சாப்பிட்டால் வாயின் ருசிகள் மீண்டும் வரும். உடலுக்குக் குளிர்ச்சியைத் தந்து  தாகம் போக்கும். தோலைத் தேனில் ஊற வைத்தும் சாப்பிடலாம். அல்லது நெல்லிக்காயை ஊற வைப்பது போல் சர்க்கரைப் பாகிலும் ஊற வைத்துச் சாப்பிடலாம். சீதக் கழிச்சலுக்கு இது நன்மை பயக்கும்.  உடல் சூடு உள்ளவர்களுக்கு சூடு தணியும்,. வெயில் வேளையில் நாரத்தங்காய்ச் சாறு எடுத்துச் சர்க்கரை, நீர் சேர்த்து அருந்தினால் வெயிலின் தாக்கம் குறையும்.

நாரத்தம்பழச் சாறுடன் பனங்கல்கண்டு அல்லது தேன் சேர்த்துச் சாப்பிட்டால் வெள்ளை அணுக்கள் நன்றாக உற்பத்தி ஆகி உடலில் நோய் எதிர்ப்புச் சக்தி அதிகரிக்கும்.  கர்ப்பிணிப் பெண்களுக்கும் சுகப்பிரசவத்திற்கு இதன் சாறை சர்க்கரையோ வெல்லமோ பனங்கல்கண்டோ சேர்த்துச் சாப்பிட்டால் சுகப் பிரசவம் ஆகும். வயிற்றில் வாயுத் தொல்லை அதிகரித்து வயிறு உப்புசமாக இருக்கையில் சாறோடு வெந்நீர் கலந்து சாப்பிடலாம். உடனடி நிவாரணம் கிடைக்கும்.

தொடரும்

Friday, July 8, 2016

உணவே மருந்து! மணத்தக்காளி வற்றல்!

மணத்தக்காளிக் கீரையைப் பாசிப்பருப்போடு சின்ன வெங்காயம் சேர்த்துக் கூட்டாகச் செய்து சாப்பிட்டால் வயிற்றுக் கோளாறுகளுக்குத் தீர்வு கிடைக்கும்.  இதன் இலைச் சாறோடு வேறு ஏதேனும் பழச்சாறைக் கலந்து கொண்டு குடிக்கலாம். அப்படிக் குடித்தால் வயிற்றுப் பொருமல், வயிற்றுப் புண், குடல் புண், நாக்குப் புண், மூலவியாதி போன்றவற்றுக்கு நல்ல தீர்வாக இருக்கும்.  உடல் களைப்பும் நீங்கி நிம்மதியான தூக்கமும் வரும்.  கல்லீரல் கோளாறுகள் அனைத்தையும் நீக்கும் இந்தக் கீரை மஞ்சள் காமாலை நோய்க்கும் சிறந்த மருந்தாகும்.

நல்லகாய்ச்சல் இருக்கும் நேரங்களில் இந்தக்கீரைப் பொடியோடு தண்ணீர் சேர்த்துக் கொதிக்க வைத்து வடிகட்டிச் சூடாக அருந்தினால் காய்ச்சல் குறைய ஆரம்பிக்கும். மணத்தக்காளிப் பழமும் காய்ச்சலைக் குணமாக்கும் சக்தி உள்ளது. இதை வற்றலாகச் செய்துப் பொரித்து உண்ணலாம். உடல் நலம்பெறும் வரை தொடர்ந்து இந்தக்கீரையை உண்டு வரலாம். ஆஸ்த்மா நோயாளிகளுக்கு இந்தப் பழம் சீரான மூச்சு விடுவதற்கு உதவும். புதுமணத் தம்பதிகளுக்குக் கர்ப்பம் தரிக்கவும் இந்த மணத்தக்காளிப் பழம் பயன்படும்.  கரு வலிமை அடையவும், ஆண்களுக்கு தாது வலுவுடன் இருக்கவும் இந்தப் பழத்தைத் தொடர்ந்து சாப்பிடலாம்.

தோல் வியாதிகளுக்கும் இது அருமருந்தாக உதவுகிறது. கீரையின் சாற்றை இளநீர், மோர், தயிர், பால் போன்ற ஏதாவது ஒன்றில் சேர்த்துத் தொடர்ந்து அருந்தி வந்தால் சருமம் மினுமினுப்பு அடையும்.  இந்தக்கீரையைத் தினமும் சாப்பிட்டாலும் பிரச்னை ஒன்றும் இல்லை. மனச் சஞ்சலம் நீக்கி அமைதியைத் தரும் கீரைகளில் இதுவும் ஒன்று. ரிபோஃப்ளோவின் என்னும் வைடமின் பி2யும், வைடமின் நியாசினும் இந்தக் கீரையில் இருப்பதால்  தசைகள் பலமாகிக் கண்பார்வைக்கும் இது உற்ற மருந்தாகச் செயல்படுகிறது. நெஞ்சுவலி வந்தால் கூடகீரையையும், பழத்தையும் காய வைத்துப் பொடியாக்கி தினம் அரைக்கரண்டிப் பொடியைத் தேன் கலந்து சாப்பிட்டு வந்தால் நெஞ்சு வலி குணமாகும்.

மணத்தக்காளி வற்றல், சுண்டைக்காய் வற்றல், வேப்பம்பூ ஆகியவற்றை நல்லெண்ணெயில் வறுத்துக் கொண்டு இதோடு இந்துப்பு, பெருங்காயம், ஓமம், சுக்குச் சேர்த்துப்பொடியாக்கிக் கொண்டு தினம் ஒரு ஸ்பூன் பொடியில் ஒரு கைப்பிடி சூடான சாதத்தைக் கலந்து நெய் ஊற்றிச் சாப்பிட்டு வரலாம். தீராத வயிற்றுக் கோளாறுகள் எல்லாம் நீங்கும்.

பொதுவாக வற்றல் குழம்புகள் எது செய்தாலும் அவரை வற்றல், கொத்தவரை வற்றல், கத்திரி வற்றல், சுண்டைக்காய் வற்றல், மணத்தக்காளி வற்றல் என்று எது செய்தாலும் வற்றலை நல்லெண்ணெயில் வறுத்து வைத்துக் கொண்டு குழம்பைத் தாளிதம் சேர்த்துக் கொதிக்க விட்டு இறக்கும் முன்னர் வற்றல்களைச் சேர்த்து ஒரு கொதி வந்தபின் இறக்கினால் வற்றல் சுவையுடன் இருக்கும். சிலர் வற்றல்களை வெந்நீரில் ஊற வைத்துச் சேர்ப்பார்கள். அதில் ருசியும், மணமும் மாறுபடும். 

Monday, July 4, 2016

உணவே மருந்து! மணத்தக்காளி!

மணத்தக்காளி, மனைத்தக்காளி, மிளகு தக்காளி என்றெல்லாம் அழைக்கப்படும் இதை அநேகமாக வேலி ஓரங்களிலும், வீட்டுத் தோட்டங்களிலும் சாதாரணமாக யாரும் பயிரிடாமலேயே முளைத்திருப்பதைக் காணலாம். எங்கும் பயிராகும் தாவரம் இது. சுமார் ஐம்பது அல்லது அறுபது  சென்டிமீட்டர் வரை வளரும். காய்கள் கொத்துக்கொத்தாகக் காய்க்கும். காய்கள் பச்சை நிறத்தில் இருந்தாலும் பழங்கள் ஆழ்ந்த கறுப்பு வண்ணத்தில் அல்லது சிவந்த நிறத்தில் காணப்படும். இதுவும் கத்திரி வகையைச் சேர்ந்ததே!

Image result for மணத்தக்காளிக் கீரை

படத்துக்கு நன்றி செல்லியல் கூகிளார் வாயிலாக!

இதன் கீரை, காய்கள், பழங்கள் என அனைத்துமே நாம் உண்ணக் கூடியதே! கீரையின் தண்டையும் பொடிப்பொடியாக நறுக்கிப் போட்டுச் சமைத்து உண்ணலாம். இதன் மூலம் மேற்கு ஆப்பிரிக்கா என்று சொல்லப்படுகிறது. ஆனாலும் இது இந்தியாவில் குறிப்பாகத் தமிழ்நாட்டில் அதிகம் உண்ணப்படும் கீரை வகைகளில் ஒன்றாகும். வாயில் அடிக்கடி புண் வந்து அவதிப்படுபவர்கள் மணத்தக்காளிக்கீரையைப் பாசிப்பருப்புப் போட்டுச் சமைத்து உண்டால் வாய்ப் புண்ணிலிருந்து நிவாரணம் கிடைக்கும். நோய்களைக் குணப்படுத்தும் குணம் இந்தக் கீரைக்கு அதிகம் உண்டு.

இதயத்துக்கு பலம் ஊட்டுவதாக இது உள்ளது. கீரையையும், பழத்தின் உள்ளிருக்கும் விதைகளையும் காய வைத்துப் பொடித்துக் கொண்டு தினம் காலை அரை டீஸ்பூன், மாலை அரை டீஸ்பூன் சாப்பிட்டு வந்தால் காய்ச்சல், நெஞ்சு வலி, நாள்பட்ட வயிற்றுப் புண்கள் ஆகியவற்றுக்கு நல்ல மருந்தாகும்.  நாம் உண்ணும் உணவில் உள்ள சத்துக்களைச் சரியாக எந்த இடத்துக்கு அனுப்பவேண்டுமோ அந்த வேலையை இந்தக் கீரை சரியாகச் செய்துவிடும்.  சாப்பிடும் உணவுப்பொருட்கள் நல்ல ஜீரணம் ஆகிக் கழிவுகள், சிறுநீர் ஆகியவை உடனே வெளிவரவும் உதவி செய்கிறது. உடல் நலத்தைப் புதுப்பித்துக் கொடுப்பதோடு அல்லாமல் காரணமில்லாம மன எரிச்சல், உடலில் குத்துவது போன்ற உணர்வுகள் இருந்தாலும் கூட இந்தக்கீரையைச் சமைத்துச் சாப்பிட்டால் மனமும் அமைதி அடையும். உடல் உறுப்புகளும் சீராகும்.

உடலில் தோன்றும் வீக்கங்கள், சூட்டினால் வரும் கட்டிகள் ஆகியவற்றை இந்தக் கீரை சாப்பிட்டால் அது அவற்றை எதிர்த்துப் போரிட்டு அவற்றை நீக்கிவிடும். சிறுநீரகக் கோளாறை இருந்தால் அதைச் சரி செய்து விடும். சிறுநீர் நன்கு பிரிய வழி அமைத்துக் கொடுக்கும். கசப்புச் சுவையுடன் இந்தக்கீரை இருந்தாலும் சமைத்துச் சாப்பிட்டால் கசப்புத் தெரியாது.  மணத்தக்காளிப் பழங்களும் விலை உயர்ந்த டானிக் சாப்பிடுவதை விடச் சிறப்பான சத்தைத் தரும். நீண்ட நாட்கள் மலச்சிக்கல் இருந்தால் தீர்த்து வைக்கும். நல்ல பசியை உண்டாக்கும். முக்கியமாக ஆஸ்த்மா நோயாளிகளுக்கு மணத்தக்காளி, சுண்டைக்காய் இரண்டுமே  சிறந்த மருந்து. வாரம் இரு நாட்கள் மட்டுமே மலம் கழிக்கும் பழக்கம் உள்ளவர்கள் தொடர்ந்து மணத்தக்காளிக்கீரையையும் சமைத்து உண்டு மணத்தக்காளிப் பழத்தையும் வற்றல் போட்டுச் சமைத்து உண்டால் இதில் உள்ள நார்ச்சத்தின் வேலையால் மலச்சிக்கல் தீரும்.

இந்தக்கீரையை நெய்யில் வதக்கிக் கொஞ்சம் பொடித்த மிளகு, சீரகம், உப்புச் சேர்த்துப் பெருங்காயம் போட்டு நிறைய நீர் விட்டுக் கொதிக்க விட்டுக் கஷாயமாகச் செய்து அருந்தலாம். இதன் மூலம் நீர்க்கோவை உள்ளவர்களுக்கு நீர்க்கோவை தீரும். மசியல், பொரியலாகவும் சாப்பிடலாம். கீரையையும் தண்டுகளையும் மிக்சியில் போட்டு அரைத்து சாறெடுத்தும் குடிக்கலாம். எல்லாமே வயிற்றுக்கு மிக நல்லது.


தொடரும்!

Thursday, June 30, 2016

உணவே மருந்து! சுண்டைக்காய்!

சுண்டைக்காயை வற்றல் போடுவதற்குச் சாதாரணமாகக் கொஞ்சம் புளித்த மோரைத் தான் பயன்படுத்திப் பார்த்திருப்பீர்கள். ஆனால் மாவடு போட்டபின்னர் மாவடு செலவு ஆனாலும் அதன் தண்ணீர் இருக்கும். அந்த மாவடு ஜலத்தில் சுண்டையை வற்றல் போட்டுச் சாப்பிட்டுப் பாருங்கள். சுண்டையைக் காம்பு நீக்கி முனையில் கீறி விட்டு மாவடு ஜலத்தில் போடவேண்டும். உப்பெல்லாம் சேர்க்கவே வேண்டாம். அதில் இருக்கும் உப்பே போதும். இரண்டு, மூன்று நாட்கள் நன்கு ஊறியதும் வெயிலில் காய வைத்து எடுத்து வைக்க வேண்டும்.

சுண்டைக்காய் வற்றல் குழம்பில் சிலர் வற்றலை வெந்நீரில் நனைத்துச் சேர்க்கின்றனர். இது வற்றலில் இருக்கும் உப்பை மட்டுமே அகற்றும். ஆனால் வற்றல் குழம்பில் சுவையாக இருக்காது. ஆகவே சுண்டைக்காய் வற்றல் குழம்பு செய்யும் முன்னர் வற்றலை நல்லெண்ணெயில் வறுத்துத் தனியாக வைத்துக் கொள்ள வேண்டும். குழம்புக்குத் தாளிக்க வேண்டியதெல்லாம் தாளித்துக் குழம்புப்பொடியும் உப்பும் சேர்க்கையில் நினைவாக உப்பைக் குறைத்துச் சேர்க்கவேண்டும். குழம்பு கொதி வந்த பின்னர் வறுத்துத் தனியாக வைத்திருக்கும் வற்றலைச் சேர்த்து ஒரு கொதி விட்ட பின்னர் இறக்கி வைக்கலாம். பொதுவாக வற்றல் குழம்பு ரொம்பக் கெட்டியாகவும் இருக்கக் கூடாது. ரொம்ப நீர்க்கவும் இருக்கக் கூடாது. நிதானமாக இருக்க வேண்டும்.

சுண்டைக்காயைப் பச்சையாகப் போட்டு சாம்பார் செய்யலாம். சாம்பாரில்  பச்சைச் சுண்டைக்காயை வதக்கிச் சேர்த்து வறுத்து அரைத்து விட்டால் நல்ல மணமாகவும் ருசியாகவும் இருக்கும். அதே போல் சுண்டைக்காயை வதக்கி வேக விட்டுக் கொண்டு தேங்காய் சேர்த்துக் கொஞ்சம் போல் வெல்லம் போட்டுக் கறியும் செய்யலாம். வாரம் மூன்று நாட்களாவது சுண்டைக்காயை உணவில் சேர்க்க வேண்டும். வயிற்றுப் புண்கள் ஆறும். நீரிழிவினால் ஏற்படும் மயக்கம், படபடப்பு போன்றவைக்கு நல்லது. மலச்சிக்கல் இருக்காது. உடல் சோர்வையும் அகற்றும். ரத்தம் சுத்தம் அடைந்து சிறுநீரகம் சரிவர இயங்கி சிறுநீரைப் பெருக்கி விடும் குணம் படைத்தது சுண்டைக்காய்.

Wednesday, June 29, 2016

உணவே மருந்து! சுண்டைக்காய்!

சுண்டைக்காய் விஷயம்! என்பார்கள் ஒன்றுமே இல்லாததுக்கு. ஆனால் சுண்டைக்காயில் அப்படி விஷயம் இல்லாமல் இல்லை! ஹிஹிஹி, சுண்டைக்காய் விஷயம் என்பது வேறே! சுண்டைக்காயில் உள்ள விஷயங்கள் வேறே! எத்தனை பேருக்குச் சுண்டைக்காய் பிடிக்கும்? கை தூக்குங்க பார்ப்போம்! இந்தச் சுண்டைக்காய் மருத்துவ ரீதியாகவும் பலன் தரும் ஒன்று! சமையலில் அதிகம் பயன்படுத்தினால் மிகவும் நன்மை தரும். முக்கியமாக நீரிழிவு நோய்க்கு நன்மை தரும். இதிலே இரண்டு வகை உண்டு. ஒன்று காட்டுச் சுண்டை! இன்னொன்று நாட்டுச் சுண்டை!


Image result for சுண்டைக்காய்

படத்துக்கு நன்றி வெப் துனியா!


இது கிட்டத்தட்டக் கத்திரிச் செடி போலவே இருக்கும். இலைகள், பூக்கள் எல்லாம் கத்திரிப் பூப் போலவே காணப்படும், ஆனால் செடிகள் கத்திரிச் செடியை விட உயரமாக வளரும். சில செடிகளில் முட்கள் காணப்படும். கொத்துக் கொத்தாகக் காய்க்கும். காட்டுச் சுண்டை கொஞ்சம் கசப்புடன் இருக்கும். நாட்டுச் சுண்டைக்காயில் கசப்புத் தெரியாது. ஆனால் மருத்துவ குணத்தில் இரண்டும் ஒரே மாதிரித் தான்.

வயிற்றுக்கே இதம் தரும் சுண்டைக்காய். தினம் இரவு சுண்டை வற்றலை நல்லெண்ணெயில் வறுத்துச் சாப்பிட்டால் தீராத மலச்சிக்கல் தீரும், வயிற்றுப் பொருமல் இருந்தால் சுண்டைக்காய் வறுத்துக் கொண்டு அதனுடன் சுக்கு, வேப்பம்பூ, பெருங்காயம், இந்துப்பு, ஓமம் ஆகியவற்றையும் வறுத்துப் பொடி செய்து கொண்டு சூடான சாதத்தில் அரைக் கரண்டி/ஒரு டேபிள் ஸ்பூன் பொடியைப் போட்டுக் கொண்டு நெய் அல்லது நல்லெண்ணெய் ஊற்றிச் சாப்பிட்டால் வயிற்றுப் பொருமல் அடங்கும். வாயுத் தொந்திரவு குறையும். பித்தம் குறையும். வாயில் சுவை தெரியாமல் இருந்தால் தெரிய ஆரம்பிக்கும்.

இந்தச் சுண்டைக்காய் கபம் உள்ளவர்களுக்கு அருமருந்தாகும். ரத்தம் சுத்தியடையும். கல்லீரல், கணையத்துக்கும் அது தொடர்பான நோய்களுக்கும் அருமருந்து. சுண்டைக்காயோடு மிளகு பொடித்துச் சேர்த்துக் கருகப்பிலையும் சேர்த்துக் கஷாயம் செய்து சாப்பிட வயிற்றில் உள்ள பூச்சிகள் எல்லாம் ஒழியும்.

நெஞ்சின் கபம்போம் நிறைகிருமி நோயும்போம்
விஞ்சுவா தத்தின் விளைவும்போம் - வஞ்சியரே
வாயைக் கசப்பிக்கும் மாமலையில் உள்ள சுண்டைக்
காயைச் சுவைப்பவர்க்குக் காண்!
என்று சுண்டைக்காயைப் பற்றி அகத்தியர் கூறி இருப்பதாக விக்கி பீடியா கூறுகிறது. இந்தப் பாடல் குறித்து நான் அறிந்திருக்கவில்லை. இனி சுண்டைக்காயை வற்றல் போடுவது குறித்தும், பச்சையாகச் சாப்பிடுவது குறித்தும் ஒவ்வொன்றாக அறிவோம்.

Tuesday, May 31, 2016

உணவே மருந்து, தென்னை, தேங்காய்!

தேங்காய் எண்ணெயின் அபரிமிதமான பலன்களைச் சொல்லி முடியாது. அது முக்கியமாக நம் சருமத்துக்கு நல்லதொரு பாதுகாப்பைக் கொடுத்து சருமம் மிருதுவாகவும் பளபளப்பாகவும் இருக்க உதவும். குளிர் காலமாக இருந்தாலும் சரி, வெயில் அல்லது மழைக்காலமாக இருந்தாலும் தேங்காய் எண்ணெயை நம் உடலில் தடவிக் கொண்டால் நல்ல பலன் தரும்.  வெப்பத்தின் பாதிப்பிலிருந்தும் குளிரின் வறட்சியிலிருந்தும் சருமம் பாதுகாக்கப்படும். ஆறாத புண்களுக்குத் தேங்காய் எண்ணெயைத் தடவினால் பாதிப்புக் குறையும்.  முக்கியமாக நம் அன்றாட வாழ்வில் தலைக்கு தினந்தோறும் தடவிக் கொள்ளும் ஓர் எண்ணெய் எது எனில் அது தேங்காய் எண்ணெய் தான்.

நல்ல சுத்தமான தேங்காய் எண்ணெயை தினந்தோறும் தலைக்குத் தடவிக் கொண்டு வந்தோமெனில் நம் தலை மயிர் நன்கு வளர்ச்சி பெறுவதோடு அல்லாமல் பளபளவென்றும் மிருதுத் தன்மையோடு பட்டுப்போல் இருக்கும். தேங்காய் எண்ணெயைத் தடவிக் கொள்ளப் பிடிக்கவில்லை எனில் இரவில் தலை மயிரில் தடவிக் கொண்டு தலையில் உச்சந்தலையில் நன்கு அழுத்தித் தேய்த்துக் கொண்டு படுத்துக் காலை நல்ல குளியல் பொடி பயன்படுத்தித் தலையை அலசினால் தலை மயிரும் தலைப்பகுதியும் சுத்தமாக இருக்கும். வெயிலிலோ அல்லது குளிரிலோ உடலில், உதடுகளில், கால்களில் தோன்றும் வெடிப்புக்குத்தேங்காய் எண்ணெய் சிறந்த மருந்து.

தேங்காய் எண்ணெய் நூறு எடுத்துக் கொண்டு அதில் சாம்பிராணியைப் பொடித்துப் போட்டு நன்கு கலந்து அடுப்பில் வைத்துக் கிளறிப் பசை போல் ஆனதும் ஒரு பாட்டிலில் எடுத்துப் போட்டுக் கொண்டு தினமும் காலில் பித்தவெடிப்பால் அவதியுறும் பகுதிகளுக்குப் பூசி வந்தால் நாளடைவில் வெடிப்புகள் மறையும். இது வெகு காலம் கெடாது. கூட மஞ்சள் தூளும் சேர்த்துக் கொள்ளலாம். ஆனால் சுத்தமான மஞ்சள் கிழங்கில் மட்டுமே பொடித்த மஞ்சள் தூளாக இருக்க வேண்டும். தேங்காய் எண்ணெயைச் சூடாக்கிக் கீழே இறக்கி அதில் கட்டிக் கற்பூரம் சேர்த்து நன்கு கலக்கிக் கொண்டு வெதுவெதுப்பாக இருக்கையில் சளி பிடித்திருக்கும் நெஞ்சுப் பகுதிகளில் நன்கு தேய்த்துக் கொண்டு முதுகிலும் தேய்க்க வேண்டும். சளி குறைந்து நன்கு மூச்சு விட முடியும். தினம் தினம் முகத்தில் தேங்காய் எண்ணெயைத் தடவிக் கொண்டு சிறிது நேரம் ஊறிய பின்னர் குளித்தால் நல்ல பலன் கிடைக்கும். பொடுகு இருப்பவர்கள் தேங்காய் எண்ணெயோடு எலுமிச்சைச் சாறைச் சேர்த்துக் கலக்கித் தலையில் தடவி ஊறிய பின்னர் தலைக்குத் தேய்த்துக் குளிக்கலாம்.

சுத்தமான தேங்காய் எண்ணெய் என்றால் சிறிது நாட்களிலேயே அதில் ஒருவித வாசனை வரும். கடைகளில் விற்கப்படும் கலப்பட எண்ணெயில் வாசனையே வராது. சிறு குழந்தைகளுக்கு முக்கியமாகப் பிறந்த குழந்தைகளுக்கு நல்ல தேங்காய் எண்ணெயில் குளிப்பாட்டி வந்தால் சருமத் தொந்திரவே வராது. ஒரு சிலர் முற்றிய தேங்காயைத் துருவி எடுத்துக் கொண்டு கல்லுரல் அல்லது மிக்சி ஜார் அல்லது அம்மியில் அரைத்து எடுத்துக் கொண்டு அதைக் கொஞ்சம் நீர் சேர்த்து அடுப்பில் வைத்துக் காய்ச்சுவார்கள். சிறிது நேரத்தில் எண்ணெய் தனியாகப் பிரியும். அந்த எண்ணெயை உடலில் தேய்ப்பார்கள். இதன் மூலம் சுத்தமான தேங்காய் எண்ணெய் நம் கண்ணெதிரே கிடைக்கும். கொஞ்சம் வேலை இருந்தாலும் இது நம்பகத் தன்மை உள்ளது. ஆகவே இனியாவது தேங்காயையோ தேங்காயில் செய்த பொருட்களையோ ஒதுக்காமல் தேங்காய் எண்ணெயையும் உரிய முறையில் பயன்படுத்தி வாருங்கள். நலம் பெறுவோம்.