பாயசங்களில் தென் மாவட்டப் பாயசங்கள்! பாரம்பரியச் சமையல்!

அடுத்து நாம் செய்யப் போகும் பாயசம் சதசதயம்! பெயரே புதுசா இருக்கில்லை? இதை அதிகம் திருநெல்வேலிக்காரங்களோ அல்லது நாகர்கோயில், கேரளப்பகுதி/பாலக்காடு பிராமணர்களோ செய்வார்கள். அவர்களில் பெரும்பாலோருக்கு ஐயப்பன் தான் குலதெய்வமாக இருப்பான். ஒவ்வொரு வருஷமும் ஐயப்பனுக்கு ஒவ்வொரு கிராமத்திலும் இருப்பவர்கள் அனைவரும் ஒன்றுகூடி சாஸ்தாப்ரீதி என்னும் பூஜையைப் பொதுவில் செய்து ஊர்க்காரர்கள் அனைவருக்கும் மிகப் பெரிய அளவில் சமாராதனைச் சாப்பாடு போடப்படும். இது திருநெல்வேலி ஜில்லா கல்லிடைக்குறிச்சி கிராமத்துக்காரர்கள் இந்த சாஸ்தா ப்ரீதி நடக்கையில் உலகின் எந்த மூலையில் இருந்தாலும் வந்து சேர்ந்து கொள்வார்கள் என முன்னெல்லாம் சொல்லுவார்கள். இப்போ எப்படினு தெரியலை. எனக்கு இது தெரியவந்தது நாங்க அம்பத்தூரில் வீடு கட்டும்போது தான்.

எங்களுக்கு வீடு கட்டிக்கொடுத்த ஒப்பந்ததாரர் பாலக்காட்டுக்காரர். அவர் வீட்டில் அடிக்கடி பகவதி பூஜை, சாஸ்தா ப்ரீதி எல்லாம் பண்ணுவார்கள். அப்போது தான் அங்கே அரவணைப் பாயசமும், சதசதயமும் சாப்பிட்டுப் பின்னர் அவங்களிடம் செய்முறையும் கேட்டு அறிந்து கொண்டேன்.  அப்போதெல்லாம் நம்மவரும், எங்க பையரும் தொடர்ந்து 3 வருஷங்கள் சபரிமலை போய்க் கொண்டிருந்ததால் இதைப் பண்ணிப் பார்க்கலாம் என்னும் எண்ணமும் தான். ஆனால் அப்போல்லாம் பண்ணவே முடியலை. பின்னர் பல வருஷங்கள் கழிச்சு ஒரு தரம் பண்ணினேன். ஆனால் அது அரவணை. சதசதயம் பண்ணவே இல்லை. இப்போச் செய்முறையைப் பார்ப்போம். அங்கே நெல்லைத் தமிழர் முழிச்சுட்டுப் பார்த்துக் கொண்டே இருக்கார் கோபமா! கதை சொல்லிண்டே இருக்காங்களேனு!

சதசதயம் பண்ணத்தேவையான பொருட்கள்:

பச்சரிசி ஒரு ஆழாக்கு.
இதைச் சாதமாக வடித்துக்கொள்ளலாம். வெண்கலப்பானையிலேயே வடிக்கலாம். இப்போதெல்லாம் குக்கரில் வைக்கிறார்கள். சாதம் குழையலாம், தப்பில்லை.

வெல்லம் சுமார் அரைக்கிலோ பாகுவெல்லம் பொடி செய்து வைத்துக் கொள்ளவும்.

ஏலக்காய்ப் பொடி சுமார் பத்துப் பனிரண்டு ஏலக்காயைப் பொடித்தது.

தேங்காய் நல்ல பெரியதாக ஒன்று. கிராமங்களில் சாஸ்தாப்ரீதி பண்ணும்போது நூறு தேங்காய்களின் தேங்காய்ப் பாலை எடுத்துக் குறைந்து நூறு லிட்டராவது பாயசம் பண்ணுவார்களாம்.  நமக்கு இங்கே ஒன்று போதும். தேங்காயை உடைத்துத் துருவி முதல் பால், இரண்டாம் பால், மூன்றாம் பால் என எடுத்துக்கொள்ள வேண்டும்.

தனியாக ஓர் அரைமூடித் தேங்காயைப் பல்லுப் பல்லாகக் கீறி வைத்துக் கொள்ளவேண்டும்.

கதலிப்பழம் (தேன் கதலி என்பார்கள்) அது இல்லைனால் நம்ம பூவனே போதும். 2 அல்லது மூன்று கனிந்ததாக.

நெய் சுமார் கால் கிலோ

வடித்த சாதத்தை ஓர் வாயகன்ற பாத்திரத்தில் போட்டு நெய்யைப் பாதி விட்டுக் கரண்டியால் நன்கு மசித்துக் கொள்ள வேண்டும். பொடி செய்த வெல்லத்தை நீரில் போட்டுக் கரைத்துக் கொண்டு கல், மண் இல்லாமல் வடிகட்டி அடுப்பில் ஓர் அடிகனமான பாத்திரத்தில் அல்லது உருளியில் போட்டுக் காய்ச்சவேண்டும்.. வெல்லம் நன்கு கரைந்து வரும்போது மசித்த சாதத்தை அதில் போட்டு நன்கு கிளறிக் கொடுக்கவும். தேவையானால் அரை டீஸ்பூன் உப்பைச் சேர்க்கவும். இனிப்பைத் தூக்கிக் காட்டும். பின்னர் மூன்றாம் பாலை விட்டுக் கொதிக்க விடவும். அது சேர்ந்து வரும்போது இரண்டாம் பாலை விட்டு விட்டுக் கதலிப்பழங்களை வில்லை வில்லையாக நறுக்கிப் பாயசத்தில் சேர்க்கவும். இரண்டாம் பாலை ஊற்றிக் கொதி வந்து சேர்ந்து வந்ததும் முதல் பாலை விட்டு அடுப்பை அணைக்கவும். ஏலக்காய்ப் பொடி சேர்க்கவும். மிச்சமிருக்கும் நெய்யில் நறுக்கி வைத்திருக்கும் தேங்காய்க் கீற்றுக்களைப் பொன்னிறமாக வறுத்துச் சேர்க்கவும்.  முந்திரிப்பருப்பெல்லாம் வேண்டாம். வேண்டுமானால் பிடித்தால் சுக்கை நன்றாகப் பொடி செய்து சேர்க்கலாம். பழத்தைப் பாயசத்தில் இருந்து நீக்காமல் அதோடு இலையில் பாயசத்தை விட்டுக் கொண்டு சூடாகச் சாப்பிட்டுப் பார்க்கவும்.

அடுத்து அரவணைப் பாயசத்தைப் பார்ப்போமா? கிட்டத்தட்ட சதசதயம் மாதிரித் தான். கொஞ்சமே வேறுபாடு!

 அரவணைப் பாயசம்


ஐயப்பன் பூஜைக்கு அரவணைப் பாயசம் செய்யறது உண்டு.  இதற்குத்


தேவையான பொருட்கள்:

நல்ல பச்சரிசியாக ஒரு கிண்ணம் சுமார் 200 கிராம். நெய் அரைகிலோவில் இருந்து ஒரு கிலோ வரையிலும் தாராளமாய்த் தேவை. வெல்லம் ஒரு கிலோ. தேங்காய் ஒன்று. உடைத்துப் பல்லுப் பல்லாகக் கீறிக்கொள்ளவும். ஏலக்காய்ப் பொடி.


வெண்கலப் பானை அல்லது திருச்சூர் உருளியில் அரிசியை நன்கு கழுவிக் களைந்து கொண்டு சாதமாகக் குழைத்துக் கொள்ளவும். ஒரு கிலோ நெய்யில் அரைகிலோ நெய்யை அந்தச் சாதத்தில் விட்டு நன்கு மசிக்கவும். தனியே எடுத்து வைக்கவும். அதே உருளியில் ஒருகிலோ வெல்லத்தைத் தூள் செய்து போட்டு நீர் சேர்த்துப் பாகு வைக்கவும். பாகு நன்கு காய்ந்து வரும்போது நெய்யில் கலந்த சாதத்தைக் கொஞ்சம் கொஞ்சமாகச் சேர்க்கவும். நன்கு கிளறவும். வெல்லப் பாகும் சாதமும் சேர்ந்து வந்து கொதித்ததும், வெல்ல வாசனை போய்விட்டதா என உறுதி செய்து கொண்டு அடுப்பை அணைக்கவும். மிச்சம் நெய்யை ஒரு கடாயில் ஊற்றித் தேங்காய்க் கீறி வைத்திருப்பதை நெய்யில் வறுத்துக் கொட்டவும். ஏலப் பொடி சேர்க்கவும். இதற்கு முந்திரிப் பருப்புப் போட வேண்டாம்.


சூடாகவும் சாப்பிடலாம். ஆறினாலும் சாப்பிடலாம். நன்றாக இருக்கும். குறைந்தது ஆறு மாதங்களுக்கு வீணாகாது.

அடுத்து ஜவ்வரிசி, கடலைப்பருப்பு வெல்லப் பாயசம். இதுவும் தேங்காய்ப் பால் சேர்த்து. வெல்லம் போட்டுப் பண்ணும் பாயசங்களிலே தேங்காய்ப் பால் நன்றாக ஒத்துப் போகும்.

கடலைப்பருப்பு, ஜவ்வரிசி வெல்லப் பாயசம்:


தேவையான பொருட்கள் : 50 கிராம் கடலைப்பருப்பு.  50 கிராம் ஜவ்வரிசி, வெல்லம் 200 கிராம், தேங்காய்ப் பால் ஒரு கிண்ணம், ஏலக்காய்ப் பொடி சிறிது. முந்திரிப்பருப்பு, திராக்ஷைப் பழம் நெய்யில் வறுத்துக் கொள்ளவும்.  நெய் 50 கிராம்


கடலைப்பருப்பை வெறும் வாணலியில் வறுத்துக் களைந்து கொண்டு வேக வைக்கவும்.  ஜவ்வரிசியையும் ஒரு டேபிள் ஸ்பூன் நெய்யில் வறுத்துக் கொண்டு நீர் சேர்த்து நன்கு வேக வைக்கவும். தேங்காய் மூடியைத் துருவிக் கொண்டு மிக்சி ஜாரில் போட்டு அரைத்துப் பால் எடுத்து வைத்துக்கொள்ளவும்.  வெல்லத்தைத் தூளாக்கவும்.  வேக வைத்த கடலைப்பருப்பு, ஜவ்வரிசியைக் கொஞ்சம் நீர் சேர்த்துக் கொதிக்க விட்டுக் கொள்ளவும்.  வெல்லம் சேர்க்கவும்.  வெல்ல வாசனை போகும் வரை கொதிக்க விடவும்.  தேங்காய்ப் பாலைக் கொஞ்சம்கொஞ்சமாகச் சேர்க்கவும்.  தேங்காய்ப் பாலைச் சேர்த்ததும் அதிக நேரம் கொதிக்க வேண்டாம்.  கீழே இறக்கி ஏலப்பொடி சேர்த்துக் கொண்டு நெய்யில் முந்திரிப் பருப்பு, திராக்ஷையை வறுத்துச் சேர்க்கவும்.  சூடான, சுவையான பாயசம் கொஞ்சம் வித்தியாசமாகத் தயார்.

பாயச வகைகள் 2! பாரம்பரியச் சமையல்!

பாசிப்பருப்புப் பாயசத்தோடு கடலைப்பருப்பும் போட்டுச் செய்வார்கள். இரண்டையும் சிவக்க வறுத்துக்கொண்டு குழைய வேக விட்டு, வெல்லம் சேர்த்துக் கொண்டு அரிசி மாவு கொஞ்சம் போல் கரைத்துவிடுவார்கள். தனித்தனியாகப் பருப்புகள் தெரியாமல் இருப்பதற்காக! இதற்கும் முந்திரிப்பருப்பு, திராக்ஷை வறுத்துச் சேர்த்து ஏலப்பொடி போட்ட பின்னர் தேவையான பாலைக் காய்ச்சியும் விட்டுக்கலாம். அல்லது குடிக்கும்போதும், சாப்பாடில் பரிமாறும்போது சேர்த்துக்கலாம்.

பாசிப்பருப்புப் பாயசத்தில் அரிசி, தேங்காய் அரைச்சு விட்ட பாயசம். இதற்கும் முன் சொன்னாற்போல் பாசிப்பருப்பு, கடலைப்பருப்பு வறுத்துக் கொண்டு குழைய வேக வைக்க வேண்டும். முன் கூட்டியே அரிசியை ஊற வைக்க வேண்டும். இதோடு சேர்த்து ஏலக்காயையும் ஊற வைக்கலாம். நான்கு பேருக்கான பாயசம் எனில்  ஒரு கிண்ணம் பாசிப்பருப்புக்கு, அரைக்கிண்ணம் கடலைப்பருப்பு, தேங்காய் ஒரு சின்ன மூடி, இரண்டு மேஜைக்கரண்டி அரிசி, வெல்லம் ஒன்றரைக் கிண்ணம், ஏலக்காய், முந்திரிப்பருப்பு, திராக்ஷை தேவைக்கு.

பருப்பு வகைகளை வறுத்துக்கொண்டு குழைய வேக வைத்துக்கொண்டு அது கரையும் நேரத்தில் ஊற வைத்த அரிசி, தேங்காயோடு சேர்த்து அரைக்க வேண்டும். ஏலக்காயையும் இதோடு சேர்த்து அரைத்துவிடலாம். அரைத்த விழுதை வெந்து கரைந்திருக்கும் பருப்பில் சேர்த்துக் கொண்டு தேவையான நீர் சேர்க்கவும். அரிசி நன்கு வெந்து கரைய வேண்டும். அரிசியும் பருப்புக்களும் ஒன்றோடு ஒன்று நன்றாகக் கலந்த பின்னர் வெல்லத்தைச் சேர்க்க வேண்டும். வெல்லம் போட்டு வெல்ல வாசனை போகக் கொதித்த பின்னர் கீழே இறக்கி நெய்யில் முந்திரிப்பருப்பு, திராக்ஷை வறுத்துச் சேர்க்க வேண்டும். இதற்குப் பால் விட வேண்டாம். பொதுவாகத் தேங்காய் சேர்த்த பாயசங்களிலே பால் விடுவது இல்லை. ரொம்ப ஆசாரக்காரங்க தேங்காய்ப் பாலோடு மாட்டுப்பாலைச் சேர்த்தால் சாப்பிடுவதும் இல்லை. கள்ளுக்குச் சமானம் என்பார்கள்.

அரிசி, தேங்காய் அரைச்சு விட்ட பாயசம் அல்லது மலையாளத்தில் சொல்லும் இடிச்சுப் பிழிஞ்ச பாயசம்.

இதற்கு ஒரு கிண்ணம் அரிசியை நன்கு களைந்து கொண்டு நெய்யில் வறுத்துப் பொடித்துக்கொண்டு, அடி கனமான பாத்திரத்தில் அல்லது உருளியில் ஒரு மேஜைக்கரண்டி நெய்யை விட்டுவிட்டு பொடித்த அரிசியோடு நீர் சேர்த்து நன்கு குழைய வேக விட வேண்டும். அடியில் பிடிக்காமல் அடிக்கடி கிளறி நீர் தேவையானால் சேர்க்க வேண்டும்.

சின்னத் தேங்காயாக ஒன்றை எடுத்து உடைத்துக் கொண்டு துருவி மிக்சி ஜாரில் போட்டுத் தேங்காய்ப் பாலைத் தனித்தனியாக 3 முறை எடுத்து வைத்துக் கொள்ளவும். தேங்காய்ப் பால் பிழிந்த சக்கை தனியே இருக்கட்டும். அரிசி வேகும்போது முதலில் கடைசியில் எடுத்த பாலை விட்டு நன்கு கிளறிக்கொடுக்க வேண்டும். அது சேர்ந்து வரும்போது தேவையான வெல்லத்தைச் சேர்க்கவும். மேற்சொன்ன அளவுக்கு இரண்டு கிண்ணம் வெல்லத்தூள் சரியாக இருக்கும். வெல்லம் நன்கு கரைந்து வந்ததும் வெல்ல வாசனை போகக் கொதிக்க விடவேண்டும். இரண்டாம் பாலைச் சேர்க்கவும். இரண்டாம் பால் சேர்த்துக் கொதி வரும்போது கீழே இறக்கிவிட்டு முதலில் எடுத்த பாலைச் சேர்த்துவிட்டு, பக்கத்தில் இன்னொரு கடாயில் நெய்யைக் கொஞ்சம் தாராளமாக விட்டுக்கொள்ளவும். இரண்டு மேஜைக்கரண்டி சரியாக இருக்கும். அதில் பல்லுப் பல்லாகக் கீறிய தேங்காய்க் கீற்றுகள்,பால் பிழிந்ததும் எடுத்து வைத்திருக்கும் தேங்காய்ச் சக்கை ஆகியவற்றைப் போட்டுச் சிவக்க வறுத்துப் பாயசத்தில் கொட்டவும். ஏலக்காய்ப் பொடி சேர்க்கவும். இதற்கு முந்திரிப்பருப்பு, திராக்ஷை எல்லாம் தேவையானால் போட்டுக்கலாம். அவசியம் இல்லை.

 அக்கார அடிசில் செய்முறை

 அக்கார அடிசிலுக்குப் பால் நிறைய வேண்டும். ஆண்டாள் செய்தாப்போல் நூறு தடா இல்லைனாலும் ஒரு லிட்டராவது வேண்டும். நல்ல பச்சை அரிசி கால்கிலோ, வெல்லம் பாகு அரை கிலோ, நெய் கால் கிலோ. பாசிப்பருப்பு ஒரு கிண்ணம். நீரே வேண்டாம். பாலிலேயே வேகவேண்டும். ஆகவே முடிந்தவரைக்கும் ஒரு லிட்டருக்குக் குறையாமல் பால் எடுத்துக்கொள்ளவும். குங்குமப் பூ, ஏலக்காய், பச்சைக்கற்பூரம் ஒரு சிட்டிகை அளவு மட்டுமே. முந்திரிப்பருப்பு, திராக்ஷை எல்லாம் தேவைப்பட்டால். சாதாரணமாய் இதற்குப் போடுவது இல்லை. ஆனால் நான் போடுவேன்.


பாசிப்பருப்பையும், பச்சை அரிசியையும் வெறும் வாணலியில் தனித்தனியாக வறுத்துக்கொள்ளவும். நன்கு களைந்து சுத்தம் செய்து கொள்ளவும். வெண்கலப்பானையை அடுப்பில் வைத்துப் பாலைக் கொஞ்சமாக முதலில் ஊற்றவும். தேவையான பாலில் பாதி அளவு ஊற்றலாம். பால் கொதிக்க ஆரம்பித்ததும் பாசிப்பருப்பைக் களைந்து சுத்தம் செய்து அதில் போடவும். சிறிது நேரத்துக்கு ஒருமுறை கிளறிக்கொடுக்கவும். பால் அடியில் பிடிக்காமல் பார்த்துக்கொள்ளவும். இதை நான் ஸ்டிக் பாத்திரத்திலோ அல்லது குக்கரிலோ செய்தால் அவ்வளவு சுவை வராது. பருப்பு வெந்ததும் அரிசியைக் களைந்து அதோடு சேர்த்துப் போடவும். மிச்சம் இருக்கும் பாலைக்கொஞ்சம் கொஞ்சமாய்ச் சேர்க்கவும். அரிசி நன்கு வெந்து குழையும் பதம் வரவேண்டும். அப்போது வெல்லத்தைத் தூளாக்கிச் சுத்தம் செய்து சேர்க்க்கவும். வெல்ல வாசனை போக நன்கு கொதிக்கவேண்டும். வெல்லம், பால் இரண்டும் சேர்ந்து வரும்வரையில் நெய்யைக் கொஞ்சம் கொஞ்சமாய்ச் சேர்த்து விடாமல் கிளற வேண்டும். நன்கு கலந்து பாயசம் போலவும் இல்லாமல் ரொம்பக் கெட்டியாக உருட்டும்படியும் இல்லாமல் கையால் எடுத்துச்சாப்பிடும் பதம் வரும் வரை கிளற வேண்டும். பின்னர் ஏலப்பொடி சேர்த்துப் பாலில் கரைத்த குங்குமப் பூவும் சேர்த்துப் பச்சைக்கற்பூரமும் சேர்க்கவும். தேவைப்பட்டால் நெய்யில் முந்திரிப்பருப்பு, திராக்ஷை வறுத்துச் சேர்க்கவும். அது இல்லாமலேயே நன்றாக இருக்கும்.


குக்கரில் வைப்பவர்கள் பாதிப்பாலை விட்டுக் குக்கரில் அரிசி, பருப்பைக் குழைய வைத்துக்கொண்டு பின்னர் வெளியே எடுத்து அடிகனமான பாத்திரத்தில் வெல்லத்தைப் போட்டு நீர் அல்லது பால் விட்டுக் கரைத்துக் கொதிக்கையில் குக்கரில் இருந்து எடுத்த கலவையைப் போட்டு மிச்சம் பாலையும் விட்டுக் கிளறவேண்டும். இதிலும் அடிப்பிடிக்காமல் நன்கு கிளற வேண்டும். பின்னர் நன்கு சேர்ந்து தளதளவென்று கொதிக்க ஆரம்பித்ததும், வெல்ல வாசனை போய்விட்டதா என்று பார்த்துவிட்டு அடுப்பை அணைக்கவும். ஏலக்காய், குங்குமப்பூ, பச்சைக்கற்பூரம் சேர்க்கவும்.

இந்த என் செய்முறை நாலைந்து வருஷங்கள் முன்னர் குமுதத்தில் எழுத்தாளர் சாரு நிவேதிதாவால் பகிரப்பட்டது. என் பெயரோடு தான் பகிர்ந்திருந்தார் . இதை நம்ம ஏடிஎம்மும் (அப்பாவி தங்கமணி), என் மாமியும் சொன்னார்கள். மாமி அந்தப் பக்கத்தை வெட்டி எடுத்துக் கொண்டும் வந்து காட்டினார்கள். அதைத் தேடணும். :)))))))

பாரம்பரியச் சமையலில் பாயச வகைகள்!

நம் சாப்பாடில் குழம்பு வகைகள், சாம்பார் வகைகள், பிட்லைகள், கறி, கூட்டுகள், துவையல், சட்னி வகைகள், பச்சடி வகைகள் எனப் பார்த்துட்டோம். இப்போப் பார்க்க வேண்டியது விசேஷ சமையல்களில் முதலில் இடம் பெறும் பாயசம் தான். வெல்லம் போட்டும் பாயசம் பண்ணலாம். சர்க்கரை போட்டும் பாயசம் பண்ணலாம். ஆனால் பாரம்பரியம் எனில் வெல்லம் தான்.   வெல்லம் போட்ட பண்டங்களே நம் பாரம்பரிய உணவு வகைகளிலும் முக்கியமான விசேஷங்களிலும் ஸ்ராத்தம் போன்ற நாட்களிலும் இடம் பெறும். ஆகவே முதலில் வெல்லப் பாயச வகைகளைப் பார்ப்போம். செய்யும் முறையில் செய்தால் வெல்லப் பாயசமும் ருசியாகவே இருக்கும். முதலில் எல்லோரும் செய்யும் பாசிப்பருப்புப் பாயசத்தைப் பார்ப்போம்.

பாசிப்பருப்புப்பாயாசம் பொதுவாக ஸ்ராத்தங்களிலேயே செய்யப்படும் என்றாலும் சில வீடுகளில் பூஜைகளின் நிவேதனங்களுக்கும் செய்வார்கள். இதில் தனிப் பாசிப்பருப்புப் போட்டும் இருக்கிறது. கடலைப்பருப்புச் சேர்த்தும் இருக்கிறது. இதிலேயே அரிசி, தேங்காய் அரைத்துவிட்டும் பண்ணுவார்கள். ஒவ்வொன்றாகப் பார்ப்போம்.

பாசிப் பருப்புப் பாயசம். சுமார் நான்கு நபர்களுக்கு. ஒரு கிண்ணம் பாசிப்பருப்பு, அதே அளவுக்குத் தூள் செய்த வெல்லம். தித்திப்பு அதிகம் வேண்டும் எனில் அரைக்கிண்ணம் கூடப் போட்டுக்கொள்ளலாம். பால் ஒரு கிண்ணம். காய்ச்சாத பாலே இருக்கலாம். ஏலக்காய்ப் பொடி ஒரு தேக்கரண்டி. முந்திரிப்பருப்பு, திராக்ஷை, இவற்றை வறுக்க ஒரு மேஜைக்கரண்டி நெய்.

அடி கனமான ஒரு பாத்திரத்தில் பாசிப்பருப்பைப் போட்டு வெறும் பாத்திரத்திலேயே நன்கு சிவப்பாக வரும்வரை வறுத்துக்கொள்ளவும். பாசிப்பருப்பு வாசனை வரும்வரை என வைத்துக்கொள்ளலாம். வாசனை வந்ததும் எடுத்து நன்கு நீர் விட்டுக் கழுவவும். அதே அடி கனமான பாத்திரத்தை ஒரு தரம் அலம்பி விட்டு விட்டுப் பாசிப்பருப்பை அதில் நீரோடு சேர்க்கவும். நன்கு குழைய வேக விடவும். நீர் தேவை எனில் அவ்வப்போது கொஞ்சம் சேர்க்கலாம். பாசிப்பருப்பு நன்கு வெந்து நீரும் அதுவுமாகச் சேர்ந்து உங்களுக்குத் தேவையான நிலைக்கு வந்ததும் தூள் செய்த வெல்லத்தைச் சேர்க்கவும். வெல்லம் நன்கு கரைந்து வெல்ல வாசனை போகக் கொதிக்க வேண்டும். வெல்ல வாசனை போய்விட்டதா எனப் பார்த்துக் கொண்டு பச்சையாகவே காய்ச்சாத பாலை அதில் சேர்க்கவும். பால் கொதித்து மேலே வந்ததும் அடுப்பை அணைக்கவும். நெய்யில் முந்திரிப்பருப்பு, திராக்ஷை வறுத்துச் சேர்த்து ஏலக்காய்ப் பொடி சேர்க்கவும். விரும்பினால் தம்பளர்களில் ஊற்றிக் குடிக்கலாம். அல்லது சாப்பிடும்போது கிண்ணம் அல்லது தம்பளர்களில் ஊற்றிக் கொண்டு சாப்பிடலாம்.

இந்தப் பாயசத்தையே இவ்வளவு வெல்லம் சேர்க்காமல் அதில் பாதிஅளவு சேர்த்துக் கொதிக்க வைத்துக்கொண்டு பின்னர் பாலையும் இரு மடங்காக ஊற்றிக் கொதிக்க வைத்து வெறும் ஏலப்பொடி மட்டும் சேர்த்தால் அது பாசிப்பருப்புக் கஞ்சி அல்லது பயத்தம் கஞ்சி! இதில் நெய்யில் வறுத்த முந்திரிப்பருப்பு, திராக்ஷைகளைச் சேர்க்கக் கூடாது. ஸ்ராத்தம் வரும்போது  ஸ்ராத்தத்துக்கு முதல் நாள் மிகவும் ஆசாரமானவர்கள் இந்தப் பயத்தம் கஞ்சியை மட்டுமே சாப்பிடுவார்கள்.




படத்துக்கு நன்றி கூகிளார்.

பாரம்பரியச் சமையலில் சில பச்சடி வகைகள்!

வாழைப்பழத்திலும் பச்சடி பண்ணலாம். கனிந்த வாழைப்பழத்தை வில்லைகளாக நறுக்கிக்கொண்டு அதோடு தேங்காய் சேர்த்துக்கொண்டு கொஞ்சம் சர்க்கரையும் உப்பும் கலந்து பிசறிக்கொண்டு தயிரில் போட்டுச் சாப்பிடலாம். எல்லோருக்கும் இது பிடிக்கும் என்று சொல்ல முடியாது. அதே போல் ஜவ்வரிசியை நன்கு எண்ணெய் விட்டுப் பொரித்துக் கொண்டு உப்புச் சேர்த்துத் தயிரில் போட்டு ஊறியதும் கடுகு, பச்சை மிளகாய், கருகப்பிலை தாளித்துச் சாப்பிடலாம். கெட்டி அவலிலும் இதே மாதிரி பண்ணலாம் என்றாலும் அது சாப்பிடுவதற்குச் செய்யும் தயிர் அவல் மாதிரி இருக்கும். அவ்வளவாக ருசிக்காது.

மாங்காய் வற்றலை வெந்நீரில் ஊற வைத்துக் கொண்டு அதோடு ஒன்றோ இரண்டோ பச்சை மிளகாயைத் தேவையான காரத்துக்கு ஏற்ப எடுத்துக் கொண்டு நன்கு அரைத்துத் தயிரில் கலக்கலாம். பின்னர் தேவையான உப்பைப் போட்டு எண்ணெயில் கடுகு, பெருங்காயம், பச்சை மிளகாய், கருகப்பிலை தாளித்துக் கொத்துமல்லி தூவலாம். வடு மாங்காய் ஊறுகாயிலும் கொஞ்சம் வெம்பினாற்போல் இருக்கும் மாங்காய்களை எடுத்துக்கொண்டு மேற்சொன்ன மாதிரி காரம் சேர்த்து அரைத்துத் தயிரில் கலந்து தாளிதங்கள் செய்து சாப்பிடலாம்.

வெண்டைக்காய், தக்காளி ஆகியவற்றை நறுக்கிக் கொண்டு தாளிதம் செய்து உப்புச் சேர்த்து நன்கு வதக்கிக் கொண்டு தயிரிலும் போட்டுச் சாப்பிடலாம். முன்னர் வெண்டைக்காய்ப் புளிப்பச்சடி பார்த்தோம். மாற்றாக தயிரில் போட்டும் பண்ணிக்கொள்ளலாம். வெறும் தேங்காய் மட்டும் போட்டுப் பண்ணும் தயிர்ப் பச்சடியிலும் மேற்சொன்ன மாதிரி காய்களைச் சேர்த்தும் பண்ணலாம். தேங்காய் மட்டும் போட்டும் பண்ணலாம். வாழைத்தண்டையும் பொடியாக நறுக்கிக் கொண்டு உப்புப் போட்டுச் சிறிது நேரம் வைத்துவிட்டுப் பின்னர் நீரை வடித்துக் கொண்டு தயிரில் போட்டுக் கலக்கிக் கொண்டு கடுகு, பெருங்காயம், பச்சை மிளகாய், கருகப்பிலை போட்டுத் தாளித்துக் கொண்டு சாப்பிடலாம். வெள்ளரிக்காய்ப் பச்சடி போல் இதுவும் நன்றாக இருக்கும். உடலுக்கும் நல்லது.

பச்சடி வகைகள் முடிந்தன.

பாரம்பரியச் சமையலில் பலாப்பழப் பச்சடி போன்றவை!

பலாப்பழக் காலம் நெருங்கி விட்டது. அரைக்காயாக இருந்தாலும் சரி, பலாப்பழமாக இருந்தாலும் சரி, நான்கு பேருக்குத் தேவையான அளவு சுமார் 12 சுளைகள்.  வெல்லம் தூள் செய்தது ஒரு கிண்ணம், அரிசி மாவு கரைத்து விட 2 டீஸ்பூன். தாளிக்க நெய் ஒரு டீஸ்பூன், கடுகு, பச்சை மிளகாய் ஒன்று



படத்துக்கு நன்றி கூகிளார்

பொடியாக நறுக்கிக் கொள்ளவும். அடுப்பில் கடாயை அல்லது கனமான பாத்திரத்தை வைத்து நறுக்கிய சுளைகளைப் போட்டு நீரைத் தேவையான அளவுக்கு விட்டு வேகவிடவும். தேவையானால் கால் டீஸ்பூன் உப்புச் சேர்க்கலாம். சுளைகள் நன்கு வெந்ததும் வெல்லத்தூளைச் சேர்த்துக் கரைய விடவும். வெல்லம் நன்கு கரைந்ததும் அரிசிமாவைக் கரைத்து விட்டு நெய்யில் கடுகு, பச்சை மிளகாய் தாளிக்கவும்.

இதையே வெல்லம் சேர்த்துக் கரைந்த பின்னர் தேங்காய் அரை மூடியைத் துருவிக் கொண்டு நன்கு அரைத்துச் சேர்க்கவும். கெட்டியாகவேண்டுமெனில் அரிசி மாவை அந்தத் தேங்காயோடு சேர்த்து அரைத்து விடவும். தேங்காய் சேர்த்த பின்னர் அதிகம் கொதிக்கவிடாமல் ஏலக்காயைப் பொடித்துப் போட்டு நெய்யில் முந்திரிப்பருப்பு, திராக்ஷை தாளிக்கவும்.

பழப்பச்சடிகள்: தக்காளிப் பழப் பச்சடி முதலில். நான்கு பேருக்குத் தேவையான அளவு கால்கிலோ தக்காளி நன்கு சிவந்த பழங்களாக எடுத்துக் கொண்டு கொதிக்கும் தண்ணீரில் போட்டுப் பாத்திரத்தை மூடி அடுப்பை அணைத்துவிடவும். சிறிது நேரம் கழித்துத் தக்காளிகளை எடுத்து ஆறவிட்டுத் தோலை உரித்தால் தோல் மட்டும் உரிபடும். இவற்றை மிக்சி ஜாரில் போட்டு நன்கு அரைத்துக் கொள்ளவும். அடுப்பில் ஓர் அடிகனமான பாத்திரத்தில் போட்டுக் கொதிக்கவிடவும். இந்த அளவுக்குச் சுமார் 200 கிராம் சர்க்கரை சேர்க்கவும். சர்க்கரை சேர்த்ததும் பச்சடி நீர்க்க ஆகிவிடும். ஆகவே நன்கு கொதிக்கவிடவும்.  சர்க்கரை நன்கு கெட்டியாகிப் பச்சடியும் கெட்டியான பதத்துக்கு வந்ததும் அடுப்பை அணைத்து ஏலக்காய் சேர்த்து நெய்யில் முந்திரிப்பருப்பு, திராக்ஷை போன்றவற்றை வறுத்துச் சேர்க்கலாம்.

மேற்சொன்ன மாதிரித் தக்காளிப் பச்சடியைக் கெட்டியாகப் பண்ணி வைத்துக் கொள்ள வேண்டும். ஆப்பிள், ஆரஞ்சு, கொய்யா, மாதுளை, வாழைப்பழம், திராக்ஷை போன்றவற்றை எடுத்துக் கொண்டு திராக்ஷையை நன்கு கழுவி வைத்துக்கொள்ளவும். மாதுளை முத்துக்களை எடுத்துத் திராக்ஷையோடு சேர்க்கவும். ஆப்பிள், வாழைப்பழம், கொய்யா ஆகியவற்றை ஒரே அளவில் நறுக்கிக் கொள்ளவும். ஆரஞ்சை உரித்துத் தோலை நீக்கிச் சுளைகளை எடுத்துக்கொள்ளவும். பேரீச்சம்பழம் இருந்தால் கொட்டை நீக்கி நறுக்கிக் கொள்ளவும். எல்லாப்பழக்கலவையையும் ஓர் வாயகன்ற பாத்திரத்தில் போட்டுக் கொஞ்சம் உப்பு, மிளகுத்தூள் சேர்த்து நன்கு கலக்கவும். பின்னர் செய்து வைத்திருக்கும் தக்காளிப் பச்சடியைக் கொட்டிக் கலக்கவும். பெரிய விசேஷங்கள், கல்யாணங்கள், நிச்சயதார்த்தம், கிரஹப்ரவேசம் போன்ற நிகழ்ச்சிகளில் பண்ணும் பழப்பச்சடி இது. எங்க வீட்டில் சின்ன சமாராதனை, வீட்டு மட்டுக்கும் பண்ணும் ஹோமங்கள், மற்றும் சில விசேஷ நிகழ்வுகளுக்கு இந்தப் பச்சடியை முதல் நாளே தனியாக செய்து வைத்துக் கொண்டு விடுவேன்.இதை சுமார் பத்து நாட்கள் வரை குளிர்சாதனப் பெட்டியில் வைக்கலாம்.



 படத்துக்கு நன்றி கூகிளார்.

பாரம்பரியச் சமையலில் புளிப்பச்சடி வகைகள்

 வெண்டைக்காய்ப் புளிப்பச்சடி செய்முறை நான்கு நபர்களுக்கு.

100 கிராம் பிஞ்சு வெண்டைக்காயை அலம்பித் துடைத்து ரொம்பப் பொடியாக இல்லாமல் நிதானமாக நறுக்கிக் கொள்ளவும்.
புளி ஓர் சின்ன எலுமிச்சை அளவுக்கு நீர்க்கக் கரைத்துக் கொள்ளவும்.

உப்பு தேவைக்கு,
மஞ்சள் பொடி, பெருங்காயப்பொடி,
பச்சை மிளகாய் ஒன்று,
சிவப்பு மிளகாய் ஒன்று, கருகப்பிலை,
வெல்லம்(கட்டாயம் சேர்த்தால் நல்லது)
தாளிக்க வெண்டைக்காய் வதக்கத் தேவையான எண்ணெய், ஒரு டேபிள் ஸ்பூன் இருக்கலாம், கடுகு.

முதலில் வெண்டைக்காயை அதற்கு மட்டும் தேவையான உப்பைச் சேர்த்து நன்கு சுருள வதக்கிக் கொண்டு தனியாக வைக்கவும். கடாயில் எண்ணெயை ஊற்றிக் கடுகு, பெருங்காயம், பச்சை மிளகாய், சிவப்பு மிளகாய், கருகப்பிலை, பெருங்காயம் தாளித்துக் கொண்டு மஞ்சள் பொடி சேர்த்துப் புளிக்கரைசலை ஊற்றவும். அதற்குத் தேவையான உப்பைப் போடவும். நன்கு சேர்ந்து கொதிக்கும்போது வதக்கிய வெண்டைக்காய்களைப் போட்டு வெல்லம் சேர்க்கவும். வெல்லம் கரைந்ததும் கீழே இறக்கி வைக்கவும். மோர்க்குழம்பு, பொரிச்ச கூட்டு, பொரிச்ச குழம்பு ஆகியவற்றோடு நன்றாக இருக்கும்.

வேப்பம்பூப்புளிப்பச்சடி! தஞ்சை ஜில்லாவில் அநேகமாகப் புது வருஷப் பிறப்பிற்கு புளியைக் கரைத்துக் கொதிக்கவிட்டுத் தான் வெல்லம், வேப்பம்பூ பொரித்துப் பொட்டுப் பச்சடி செய்வார்கள். ஆனால் நான் எப்போவும் போல் மாங்காய்ப் பச்சடியிலேயே வேப்பம்பூவைப் பொரித்துப் போடுவேன். என்றாலும் இப்போ வேப்பம்பூப் புளிப்பச்சடியைப் பார்ப்போம்.

புளி ஓர் எலுமிச்சை அளவுக்கு நன்கு கரைத்து நீரை எடுத்துக்கொள்ளவும். உப்பு தேவையான அளவுக்குச் சேர்த்துக் கொதிக்கவிடவும். நன்கு கொதித்துக் கெட்டிப் படும்போது இரண்டு டேபிள் ஸ்பூன் வெல்லத் தூளைச் சேர்க்கவும். வெல்லம் நன்கு கரைந்து வெல்ல வாசனை போகக் கொதித்ததும் தேவையானால் மாவு கரைத்து விடலாம். கெட்டியாக இருந்தால் கீழே இறக்கி விட்டு நெய்யில் கடுகு, வேப்பம்பூவைப் போடு நன்கு வறுத்துப் பச்சடியில் சேர்க்கவும்.

பறங்கிக்காய்ப் புளிப் பச்சடி

பறங்கிக்காய்ப் புளிப் பச்சடி. இதற்குக் கொஞ்சம் பழுத்த பறங்கிக்காய் தான் நன்றாக இருக்கும் என்றாலும் முற்றாத காயிலும் பண்ணலாம். தேவையான பொருட்கள்

ஒரு கீற்று பறங்கிக்காய். நன்கு கழுவித்துருவிக் கொள்ளவும். புளி ஓர் நெல்லிக்காய் அளவுக்கு ஊற வைத்துக் கரைத்து எடுத்துக்கொள்ளவும். வெல்லம் ஒரு மேஜைக்கரண்டி தூளாக. உப்பு தேவைக்கு. தாளிக்க நெய்யில் கடுகு, பச்சை மிளகாய் ஒன்று, பெருங்காயம் ஒரு சிட்டிகை.

அடுப்பில் வாணலி அல்லது கடாயை வைத்து நெய்யை ஊற்றிக் கடுகு, பச்சை மிளகாய், பெருங்காயத்தைத் தாளிதத்தில் சேர்த்துவிட்டுத் துருவிய பறங்கிக்காயைப் போட்டு நன்கு சுருள வதக்கவும். கரைத்து வைத்துள்ள புளிக்கரைசலைச் சேர்த்துத் தேவையான உப்பைப் போடவும். ஒரு கொதி வந்ததும் வெல்லம் சேர்த்துக் கொதித்ததும் கீழே இறக்கவும். வற்றல் குழம்பு, துவையல் சாதம் ஆகியவற்றோடு நன்றாக இருக்கும்.

மாங்காய்ப் பச்சடி, வேப்பம்பூ சேர்த்தும், சேர்க்காமலும்.

சின்னதாக ஒரு மாங்காய் அல்லது நடுத்தர அளவில் ஒரு மாங்காய் எடுத்துக்கொண்டு தோலைச் சீவிக்கொண்டு துண்டங்களாக நறுக்கிக் கொள்ளவும். தேவையான உப்பு எடுத்துக்கொள்ளவும்.

வெல்லம்  தூள் செய்தது இரண்டு குழிக்கரண்டி, ஏலக்காய்ப் பொடி சிறிது. தாளிக்கத் தேவையானால் நெய், கடுகு, வேப்பம்பூ சேர்த்தால் சுத்தம் செய்யப் பட்ட வேப்பம்பூ ஒரு மேஜைக்கரண்டி, தாளிக்க நெய் கொஞ்சம் கூட எடுத்துக்கொள்ள வேண்டும்.

மாங்காய்த் துண்டங்களை இரண்டு கிண்ணம் ஜலம் விட்டு நன்கு குழைய வேக வைக்கவும். கையால் மசித்தால் நன்கு மசிய வேண்டும். உப்புச் சேர்க்கவும். கொஞ்சம் வெந்ததும் தேவையான வெல்லம் சேர்க்கவும். வெல்லம் மாங்காய்த் துண்டங்களோடு சேர்ந்து நன்கு சேர்ந்து வந்ததும் தேவையானால் மாவு கரைத்து ஊற்றிக் கொள்ளலாம். நெய்யைக் காய வைத்துக் கடுகு சேர்த்துத் தாளிக்கலாம். நெய்யைக் கொஞ்சம் கூட விட்டுக் கடுகு வெடித்ததும் வேப்பம்பூவைப் போட்டு நன்கு வறுத்துச் சேர்க்கலாம். வேப்பம்பூ சேர்த்துப் புது வருடப் பிறப்பன்று மாஙாய்ப் பச்சடி பண்ணுவார்கள். வேப்பம்பூ சேர்க்காமல் சாதாரண நாட்களில் மாங்காய்ப் பச்சடி செய்து சாப்பாடோடு சாப்பிடலாம்.

மாம்பழப் பச்சடி தேவையான பொருட்கள்
மாம்பழம் ஒன்று
உப்பு அரை டீஸ்பூன்
வெல்லம் பொடி செய்தது ஒரு கிண்ணம், ஏலக்காய்ப் பொடி தேவையானால் அரை டீஸ்பூன்.
தாளிக்க நெய், கடுகு, பச்சை/வற்றல் மிளகாய்

நல்ல பழுத்த மாம்பழம் ஒன்றைத்தோல்சீவிப் பொடியாக நறுக்கிக் கொண்டு இரண்டு கிண்ணம் நீரில் வேக வைக்கவும். மாம்பழத் துண்டுகள் நன்கு வெந்ததும் அரை டீஸ்பூன் உப்புச் சேர்த்து ஒரு கிண்ணம் பொடி செய்த வெல்லத் தூள் சேர்க்கவும். வெல்லம் நன்கு கரைந்ததும் நீர்க்க இருந்தால் அரிசி மாவு கரைத்து ஊற்றவும். கெட்டிப் பட்டதும் கீழே இறக்கி நெய்யில் கடுகு, பச்சை மிளகாய்/வற்றல் மிளகாய் போட்டுத் தாளிக்கவும். பிடித்தால் ஒரு மேஜைக்கரண்டி தேங்காய்த் துருவலை நன்கு அரைத்துப் பச்சடி கொதிக்கையில் சேர்க்கலாம். இது கட்டாயம் என்பது இல்லை.

பாரம்பரியச் சமையலில் பூந்திப்பச்சடி!

பச்சடி வகைகளில் வெங்காயப் பச்சடியைப் போலவே வெள்ளரிக்காய், சுரைக்காய், காரட், முட்டைக்கோஸ், சௌசௌ ஆகியவற்றைத் துருவித் தயிரில் கலந்து பச்சடி பண்ணலாம். இதில் முட்டைக்கோஸையும், சௌசௌவையும் லேசாக வதக்கிக் கொள்ளலாம். அடுத்து கடுகுப் பச்சடி!

கடுகு-தேங்காய் பச்சடி

தேவையானவை:

கடுகு - ஒரு டேபிள்ஸ்பூன் (10 கிராம்), தேங்காய் துருவல் - அரை மூடி (100 கிராம்), தயிர் - ஒரு கப் (100 மில்லி), சுக்குப்பொடி - ஒரு சிட்டிகை, சின்ன வெங்காயம் - 2, உப்பு - ஒரு சிட்டிகை.

செய்முறை:

வெங்காயத்தைப் பொடியாக நறுக்கி லேசாக வதக்கவும். இதனுடன் தேங்காய் துருவல், கடுகு, சுக்குப் பொடி சேர்த்து மிக்ஸியில் அரைக்கவும். இந்த விழுதில், நன்றாக அடித்த தயிரைச் சேர்த்து, தேவையான உப்பு போட்டு கலக்கவும். இதை வெறுமனே சாப்பிடலாம். இட்லி, சப்பாத்தி போன்ற டிபன் அயிட்டங்களுடன் சேர்த்தும் சாப்பிடலாம்.


கத்தரிக்காய்ப் பச்சடி:

தேவையான பொருட்கள்: நல்ல பெரிய கத்தரிக்காய் ஒன்று.  புளிக்காத கெட்டித் தயிர் இரண்டு கிண்ணம். உப்பு, பெருங்காயத் தூள், தாளிக்க கடுகு ஒரு டீஸ்பூன், பச்சை மிளகாய் இரண்டு, கருகப்பிலை, கொத்துமல்லி.

கத்தரிக்காயைக் கழுவி எண்ணெய் தடவி விட்டு நடுவில் ஒரு கத்தியால் குத்தி விட்டு நெருப்பில் சுட வேண்டும்.  அல்லது மைக்ரோவேவ் அவன் அல்லது க்ரில்லரில் சுடவும்.  நடுவில் குத்தினால் தான் உள்ளேயும் வேகும்.  பின்னர் தோலை உரித்துவிட்டுப் பிசைந்து தயிரில் உப்போடு சேர்த்துக் கலக்கவும். பின்னர் எண்ணெயில் கடுகு, பச்சை மிளகாய், கருகப்பிலை, பெருங்காயம் தாளிக்கவும்.  பச்சைக் கொத்துமல்லித் தழையைப் பொடிப் பொடியாக நறுக்கித் தூவவும்.

தயிர்ப் பச்சடி வகைகளில் வடை மாவை போண்டோ மாதிரிப் போட்டுத் தயிரில் கடுகு, பச்சை மிளகாய், கருகப்பிலை, பெருங்காயம் தாளித்துக்கொட்டி உப்புச் சேர்த்துக் கொண்டு போண்டாக்களைப் போடலாம். பருப்பு உசிலி செய்யும்போது அரைக்கும் மாவை அரிசி மாவு கலந்து உருட்டிக் கொண்டு நீரில் வேகப் போட்டுத் தயிர்ப் பச்சடியாகச் செய்யலாம். நொறுங்கிப் போன அப்பளம், வடாம் ஆகியவற்றைப் பொரித்துத் தயிரை உப்புச் சேர்த்துக் கலந்து தாளித்துக் கொண்டு பரிமாறும்போது அப்பளங்களையோ வடாம்களையோ போட்டுப் பச்சடி செய்யலாம்.

பூந்திப் பச்சடி.

இதற்கு நல்ல மொறுமொறுவெனச் செய்யப்பட்ட பூந்திகள் தேவை. கடலைமாவையும் அரிசிமாவையும் கலந்து கொண்டு உப்புச் சேர்த்துக் கொஞ்சம் பெருங்காயப் பொடி சேர்த்துக் கொண்டு எண்ணெயில் பூந்திகளாய்த் தேய்த்து எடுக்கவும். பூந்தி மொறுமொறுவென இருக்க வேண்டும். தயிரில் உப்பு, பெருங்காயம், கருப்பு உப்புச் சேர்த்துக் கலந்து கொண்டு பூந்திகளைப் போட்டு நன்கு கலந்து விடவும். சாப்பிடுவதற்கு அரை மணி முன்னர் தயாரித்தல் நலம். இதற்குக் கடுகு, கொத்துமல்லி போன்றவை சேர்க்க வேண்டும் என்பது இல்லை. இம்மாதிரி வடாம், வத்தல், பூந்தி ஆகியவற்றைக் கலக்கும்போது தயிரில் உப்பைப் பார்த்துச் சேர்க்க வேண்டும். இவற்றில் ஏற்கெனவே உப்பு இருக்குமாதலால் தயிரில் போட்டதும் அந்த உப்பையும் இழுத்துக்கொள்ளும். ஆகவே பார்த்துச் சேர்க்க வேண்டும்.